بۇل تۋرالى بۇگىن وتكەن ۇكىمەت وتىرىسىندا دەنساۋلىق ساقتاۋ ءمينيسترى الەكسەي تسوي حابارلادى. ونىڭ ايتۋىنشا, ەلىمىزدە قىركۇيەكتىڭ ەكىنشى جارتىسىنان باستاپ تۇماۋعا قارسى ۆاكتسيناتسيا ناۋقانى جۇرگىزىلىپ جاتىر, دەپ جازادى Egemen.kz.
«15 قىركۇيەكتەن بەرى تۇماۋعا قارسى جىل سايىنعى ەكپە سالۋ ناۋقانى باستالدى. ەپيدەميولوگيالىق ماۋسىمدا بىرىڭعاي ديستريبيۋتور بولىپ تابىلاتىن «سق-فارماتسيا» جشس «گريپپول پليۋس» ۆاكتسيناسىنىڭ 2 526 754 دوزاسىن ساتىپ الدى. ەكپە ەل تۇرعىندارىنىڭ 13%-ىن قامتيتىن بولادى», دەپ اتاپ ءوتتى دەنساۋلىق ساقتاۋ ءمينيسترى.
سونداي-اق ءمينيستردىڭ سوزىنشە, تۇماۋعا قارسى ۆاكتسينا ءبىرىنشى كەزەكتە مەديتسينا قىزمەتكەرى, مەديتسينالىق ۇيىمداردى ديسپانسەرلىك ەسەپتە تۇرعان بالالار, جەتىم بالالار مەن اتا-اناسىنىڭ قامقورلىعىنسىز قالعان بالالارعا ءبىلىم بەرەتىن ۇيىمدارعا سالىنادى.
«بۇگىن 270 مىڭداي ادام نەمەسە حالىقتىڭ قامتىلۋى ءتيىس توبىنىڭ 10,5%-ى ەكپە سالدىرىپ ۇلگەردى», دەدى الەكسەي تسوي.