ەلىمىزدىڭ ماشينا جاساۋ سالاسىندا 120 مىڭ قازاقستاندىق ەڭبەك ەتىپ ءجۇر, دەپ حابارلايدى Egemen.kz.
بۇل تۋرالى قر يندۋستريا جانە ينفراقۇرىلىمدىق دامۋ ۆيتسە-ءمينيسترى مارات قاراباەۆ قازاقستان ماشينا جاساۋشىلارىنىڭ ءىح فورۋمىندا ايتتى.
«يندۋستريالاندىرۋ باعدارلاماسىن ىسكە اسىرۋ جىلدارىندا سالادا 4 ەسە ءوسىم بايقالىپ, ەڭ جوعارى قارقىن كورسەتتى. وڭدەۋشى ونەركاسىپتەگى سالانىڭ ۇلەسى 9%-دان 14%-عا دەيىن ارتتى. سالادا 3 مىڭنان استام كاسىپورىن, ونىڭ ىشىندە 64 ءىرى, 102 ورتا جانە 3020 شاعىن كومپانيا جۇمىس ىستەيدى. بۇل كاسىپورىنداردا شامامەن 120 مىڭ ادام جۇمىسپەن قامتىلعان», دەدى ۆيتسە-مينيستر.
سونداي-اق ول اسىرەسە اتوموبيل جاساۋ سالاسىندا ەلەۋلى سەرپىن بولعانىن ەسكە سالدى.
«سالانىڭ اۆتوموبيل جاساۋ – ءوسىم 40 ەسە, اۋىل شارۋاشىلىعى ماشيناسىن جاساۋ – ءوسىم 12 ەسە, تەمىر جول ماشيناسىن جاساۋ – ءوسىم 8 ەسە سياقتى سەكتورلارى سەرپىندى دامۋدا. يندۋستريالاندىرۋ كارتاسى جانە وڭىرلەردىڭ كاسىپكەرلىگىن قولداۋ كارتالارى شەڭبەرىندە 470 ملرد تەڭگەگە جۋىق سوماعا 150-دەن استام جوبا ىسكە قوسىلدى. 16 مىڭعا جۋىق جۇمىس ورنى قۇرىلدى», دەدى مارات قاراباەۆ.