ەلىمىزدە جازعى شومىلۋ ماۋسىمى قورىتىندىلاندى. وكىنىشكە قاراي, بيىلعى شومىلۋ ماۋسىمىندا 319 قازاقستاندىقتىڭ اجالى سۋدان كەلدى. بۇل تۋرالى قر توتەنشە جاعدايلار مينيسترلىگى ازاماتتىق قورعانىس جانە اسكەري بولىمدەر كوميتەتىنىڭ باسقارما باسشىسى قانات تۇرىسباەۆ ايتتى, دەپ حابارلايدى Egemen.kz.
«بيىلعى شومىلۋ ماۋسىمىندا تجم قۇتقارۋشىلارى 328 ادامدى, ونىڭ ىشىندە 61 بالانى قۇتقاردى. سونداي-اق ادامداردىڭ سۋداعى قاۋىپسىزدىگىن قامتاماسىز ەتۋ ماقساتىندا تجم ورتالىق جانە جەرگىلىكتى اتقارۋشى ورگاندارمەن ءوزارا ءىس-قيمىل جاساي وتىرىپ, ءىس-شارالار كەشەنىن وتكىزدى. بيىل ەلىمىز بويىنشا شومىلۋعا رۇقسات ەتىلگەن 538 ورىن بەلگىلەندى, بۇل وتكەن جىلمەن سالىستىرعاندا 93 ورىنعا كوپ. ودان بولەك, جەرگىلىكتى اتقارۋشى ورگاندارمەن جانە جەكە مەنشىك نىساندارمەن بىرلەسىپ 454 قۇتقارۋ جانە 66 مەديتسينالىق بەكەت قۇرىلدى. جانە اسا قاۋىپتى ۋچاسكەلەردە 59 ءموبيلدى قۇتقارۋ بەكەتى قويىلدى», دەدى قانات تۇرىسباەۆ وكق-دە وتكەن ءباسپاسوز ءماسليحاتىندا.
ونىڭ ايتۋىنشا, سۋدا شومىلۋ قاۋىپسىزدىگى ەرەجەسى مەن تالاپقا قاراماستان ءولىم جاعدايى تىركەلىپ وتىر.
«سۋ ايدىندارىندا 6 655 قاۋىپسىزدىك بەلگىسى جانە 1 656 اقپارات تاقتا ورناتىلدى, وندا ادامداردىڭ قازا بولۋ سەبەپتەرى مەن وقيعالارعا ىقپال ەتكەن جاعدايلار جازىلعان. ءبىزدىڭ مينيسترلىك پەن مەملەكەتتىك ورگاندار قابىلداپ جاتقان شارالارعا قاراماستان, شومىلۋ ماۋسىمى كەزەڭىندە سۋ ايدىندارىندا قاراپايىم قاۋىپسىزدىك ەرەجەلەرىن ساقتاماعان 319 ادام سۋعا كەتىپ كوز جۇمدى. ونىڭ 95-ءى كامەلەت جاسىنا تولماعان», دەيدى ول.