جەرىن زاڭداستىرا الماي جۇرگەن مۇنايلى اۋدانىنىڭ ءبىر توپ تۇرعىنى وبلىستىق اكىمدىككە باردى, دەپ حابارلايدى Egemen.kz.
مangystaumedia.kz سايتى جازعانداي, ول اۋىلدا زاڭدى مەكەن-جايى جوق 450 ءۇي بار. 2013 جىلى اقشاسىن ساناپ بەرىپ, جەردى ساتىپ العاندار وسى ۋاقىتقا دەيىن ءبىر جاپىراق قۇجاتتى الا الماي كەلەدى.
– مىنا جەر نە ۇكىمەتتە ەمەس, نە جەكەمەنشىكتە ەمەس. زاڭداستىرىپ, ءبىر شەشىمىن تابۋ كەرەك قوي. ءوزىمىز سول جەردە تۇرامىز, بىراق باسقا ۇيدە تىركەۋدە تۇرمىز, – دەيدى مەرۋەرت ايتانوۆا ەسىمدى تۇرعىن.
تۇرعىندار جەر ۋچاسكەسىن جەكە كاسىپكەردەن ساتىپ العان. بىراق, وعان ەشقانداي دالەل جوق. ال جەردىڭ وندىرىستىك شارۋاشىلىق ءۇشىن بەرىلگەنىن ولار ءۇيدىڭ بۇكىل قۇرىلىسى اياقتالعاندا عانا بىلگەن.
– جەردى ناقتى اقشاعا ساتىپ العانبىز. ءبىز تەگىن جەر سۇراپ جاتقان جوقپىز, كەزىندە ساتىپ العان جەرىمىزدى زاڭداستىرىپ بەرسە بولدى, – دەيدى ەندى ءبىرى.
مۇنايلى اۋدانى اكىمىنىڭ ورىنباسارى ەرجان كۇمىسقاليەۆ ماسەلەنى شەشۋ ءۇشىن سوتقا جۇگىنۋگە ۇسىنىس ءبىلدىرىپ وتىر. بۇل ۇيلەردى اۋداننىڭ باس جوسپارىنا ەنگىزۋ ءۇشىن جىل سوڭىنا دەيىن كۇتۋگە تۋرا كەلەدى.
– جەردى ساتقان ادام سوتتالىپ, سوتتىڭ شەشىمى شىقتى. ءبىز تۇرعىندارمەن اقىلداستىق, ولاردىڭ وكىلى جەردى راسىمدەۋ جونىندە سوتقا ارىز بەرەتىن بولدى. سوسىن اكىمدىك تە جول كورسەتىپ وتىرادى, – دەيدى مۇنايلى اۋدانى اكىمىنىڭ ورىنباسارى ەرجان كۇمىسقاليەۆ.
ەرجان كوپجاسار ۇلى ماسەلەنىڭ وسى كۇنگە دەيىن شەشىلمەۋىنىڭ سەبەبىن ايتپادى. دەگەنمەن, تۇرعىندار الاياقتىڭ قۇرىعىنا تۇسكەنىن ايتتى. ەڭ قىزىعى, ءبىر دە ءبىر قۇجاتى جوق تۇرعىن ۇيلەرگە گاز قۇبىرى مەن ەلەكتر جارىعىن اكىمدىكتىڭ ءوزى جۇرگىزىپ بەرگەن.