شىلدە ايىنىڭ سوڭىندا امەريكالىق مەديتسينالىق قوعامنىڭ JAMA جۋرنالىندا جاريالانعان ماقالا اۆتورلارى پاندەميانىڭ ءتورت ءتۇرلى اياقتالۋى مۇمكىن ەكەنىن جازدى, دەپ حابارلايدى Egemen.kz BBC-گە سىلتەمە جاساپ.
ماقالادا ءتورت ىقتيمال ستسەناري جازىلعان.
ءبىرىنشى ستسەناري - ۆيرۋستى تولىقتاي جويۋ. دارىگەرلەر شامامەن جارتى عاسىر بۇرىن شەشەك ۆيرۋسىن جويعانى سياقتى, Covid-19 ۆيرۋسىنىڭ دا كوزىن جويادى.
ەكىنشىسى - ۆيرۋس جۇقتىرۋ قاۋپىن ازايتۋ.
بۇل تۋرالى اۆتورلار «قىسقا مەرزىمدى پەرسپەكتيۆادا نەعۇرلىم ناقتى تاپسىرما», دەپ جازادى. ياعني, بەلگىلى ءبىر ەلدەگى جاپپاي ۆاكتسيناتسيا مەن قاتاڭ شەكتەۋ شارالارىن ساقتاپ, شەكارالاردى جابۋ جانە سىرتقى الەمنەن وقشاۋلاۋ ارقىلى ينفەكتسيا جۇقتىرۋ سانىن ۋاقىتشا نولگە دەيىن تومەندەتۋ. قازىرگى كەزدەگى ەڭ ايگىلى مىسال - قىزىلشا ۆيرۋسى. بالالارعا جاپپاي ۆاكتسيناتسيالاۋدىڭ ارقاسىندا اۋرۋ سيرەك كەزدەسەدى جانە ونى باقىلاۋعا الۋعا بولادى.
ءۇشىنشى ستسەناري - ۆيرۋسپەن بىرگە ءومىر ءسۇرۋ. دايىن ۆاكتسينالار (دالىرەك ايتقاندا, ولاردىڭ بولاشاق موديفيكاتسيالارى) تەك Covid-19-دىڭ اۋىر اعىمىنان جانە ولىمنەن قورعايدى دەگەن بولجامعا نەگىزدەلگەن. وسىلايشا كوروناۆيرۋس ماۋسىمدىق اۋرۋعا اينالادى. كەيدە ۆاكتسينا سالدىرعان ادامدار دا يممۋنيتەتىنىڭ تومەندەۋىنە, ۋاقىت وتە كەلە انتيدەنەلەر دەڭگەيىنىڭ تابيعي ازايۋىنا نەمەسە ۆيرۋستىڭ جاڭا مۋتاتسياسىنا بايلانىستى اۋىرۋى مۇمكىن. الايدا, حالىقتىڭ كوپ بولىگى كەز كەلگەن ۋاقىتتا جەتكىلىكتى دارەجەدە قورعالاتىن بولادى.
ءتورتىنشى ستسەناري - اسقىنۋ. الەم حالقىنىڭ ەداۋىر بولىگى ۆاكتسينا الماعان جاعدايدا ۆيرۋس تەز تارالا بەرەدى. سايكەسىنشە مۋتاتسياعا ۇشىراپ, جاڭا شتامدارى پايدا بولادى.