بۇگىن ىسكەر, ءوز جۇمىسىنىڭ حاس شەبەرى, اتىراۋ مۇناي وڭدەۋ زاۋىتىنىڭ قىزمەتكەرى زەيىن سابيت ۇلى شاماروۆ تۋرالى اڭگىمە وربىتپەكپىز.
زەيىن شاماروۆ 1969 جىلى گۋرەۆ قالاسىندا مۇعالىم مەن بالىق كومبيناتىندا ەڭبەك ەتكەن جۇمىسشى وتباسىندا دۇنيەگە كەلگەن. بالا كەزىنەن ساباققا العىر, زەرەك بولعان ول ءوزىنىڭ اتىنا زاتى ساي اتانىپ ەڭبەككە قۇشتار بولىپ وسەدى. ەر جەتىپ, اۋىل شارۋاشىلىق تەحنيكۋمىنىڭ مەحانيك ماماندىعىن ءتامامداپ, اسكەري بورىشىن وتەپ كەلەدى. 1990 جىلدارى ەڭبەككە بەلسەنە ارالاسادى. العاشقى ەڭبەك جولىن «سولتۇستىك ەمبى مۇناي بارلاۋ ەكسپەديتسياسىندا» موتوريست بولىپ قىزمەت ەتە وتىرىپ, اتىراۋ مۇناي-گاز ينستيتۋتىنىڭ ينجەنەر-تەحنولوگ ماماندىعىن ءتامامدايدى. 1995 جىلدىڭ 25 قاڭتارىندا اتىراۋ مۇناي وڭدەۋ زاۋىتىنىڭ 4-ءشى تسەحىنا ەستاكادا وپەراتورى بولىپ ورنالاسادى. ءبىر ورىندا تاپجىلماي 13 جىل ەڭبەك ەتىپ, جۇمىستىڭ اششىسى مەن تۇششىسىنا توتەپ بەرىپ ەڭبەكقورلىقتىڭ ناتيجەسىندە وپەراتور, اعا وپەراتور, ەستاكادا مەحانيگى, ەستاكادا باسشىسى لاۋازىمدارىندا ەڭبەك ەتەدى. قازىرگى تاڭدا مۇناي ونىمدەرىن ءوندىرۋ جانە تاسىمالداۋ ءوندىرىسىنىڭ رەزەرۆۋارلىق پاركىنىڭ باسشىسى مىندەتىن اتقارۋدا.
ول ۇجىمدا جۇمىس بارىسىن الدىڭعى ورىنعا قويىپ, جۇمىسشىلاردان جۇمىسقا دەگەن جاۋاپكەرشىلىكتى, ۇقىپتىلىقتى, ءتارتىپتى تالاپ ەتەدى. سەبەبى رەزەرۆۋار پاركى تىكەلەي زاۋىتتىڭ تەحنولوگيالىق قوندىرعىلارىن مۇنايمەن قامتاماسىز ەتۋ جۇمىستارىن اتقارادى.
– نەگىزىندە مەن سىزۋدى وتە جاقسى كورەمىن. بۇرىندارى وسى سىزۋعا قاتىستى قىزمەت اتقارامىن دەپ ويلايتىنمىن. وقۋدى اياقتار الدىنداعى ديپلوم قورعاۋ كەزىندە قازاق تىلىندە «بەسكە» تاپسىرعان ستۋدەنتتىڭ ءبىرى بولدىم. تاۋەلسىزدىك العان جىلدارى بارلىعى ورىس تىلىندە بولعاندىقتان, قازاق تىلىندە تاپسىرىپ, بارلىعىن تاڭعالدىرعان ەدىم. سونىڭ ارقاسىندا زاۋىتقا قىزمەتكە تۇرىپ, بۇگىنگىدەي دارەجەگە جەتىپ وتىرمىن. زاۋىت مەنىڭ ەكىنشى ۇيىمە اينالدى. مەنىڭ وسى زاۋىتتا بەلگىلى مامان بولىپ قالىپتاسۋىما كۇش سالىپ, كوپ كومەگىن تيگىزگەن جاندار بار. ولار – وراق ورازمۇحامبەتوۆ, فاتيما كەنجەعاليەۆا, نۇربەك قونىسوۆ, ۆالەري تارابرين, مارات كاريموۆ, قوسىمان كاريموۆ سىندى ءوز ءىسىنىڭ ماماندارى. سول سياقتى مەن دە كەيىنگى جاستارعا ۇلگى بولۋعا تىرىسىپ, بىلگەنىمدى ۇيرەتۋدەمىن, دەيدى زەيىن سابيت ۇلى.
وسى 26 جىل ەڭبەك جولىندا زەيىن شاماروۆ «كاسىبي قىزمەتتە جەتكەن جوعارى ناتيجەلەرى مەن مۇناي-گاز سالاسىن دامىتۋعا قوسقان ۇلەسى ءۇشىن ەنەرگەتيكا مينيسترلىگىنىڭ قۇرمەت گراموتاسىمەن, «اتىراۋ مۇناي وڭدەۋ زاۋىتىنا – 70 جىل», «اتىراۋ مۇناي وڭدەۋ زاۋىتىنا – 75 جىل», «قازاقستان مۇنايىنا – 120 جىل» مەرەكەلىك مەدالدارىمەن ماراپاتتالدى. اتىراۋ مۇناي وڭدەۋ زاۋىتىنداعى ۇزاق جىلعى ءمىنسىز ەڭبەگى ءۇشىن «بايىرعى قىزمەتكەر» اتاعىنا يە بولدى.
زەيىن شاماروۆ – وتباسىندا ءبىر ۇل, ەكى قىز تاربيەلەپ وتىرعان ۇلگىلى وتاعاسى.