ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى عاني بەيسەمباەۆ قر بعم اپپاراتتىق وتىرىسىندا وڭىرلەردەگى ادىستەمەلىك ورتالىقتار قىزمەتىنىڭ جايى جانە ونى جەتىلدىرۋدىڭ جولدارى تۋرالى باياندادى, دەپ جازادى Egemen.kz.
«قازىرگى ۋاقىتتا رەسپۋبليكامىزدا 14 وبلىستىق, 3 رەسپۋبليكالىق ماڭىزى بار قالالىق جانە 199 اۋداندىق/قالالىق ادىستەمەلىك كابينەت جۇمىس ىستەيدى. ورتا ءبىلىم بەرۋ جۇيەسى قامتيتىن مەكتەپكە دەيىنگى تاربيە مەن وقىتۋ, نەگىزگى جانە جالپى ورتا, تەحنيكالىق جانە كاسىپتىك ءبىلىم بەرۋ ۇيىمدارىندا 412 305 پەداگوگ بار. ولارعا 2773 ادىسكەر قىزمەت ەتەدى. رەسپۋبليكا بويىنشا ورتا ەسەپپەن ءبىر ادىسكەرگە 150 مۇعالىمنەن كەلەدى», دەدى عاني بەيسەمباەۆ.
ادىستەمەلىك كابينەتتەردىڭ كادرلىق الەۋەتىنە نازار اۋدارساق, 2773 ادىسكەردىڭ 6,6%-ىندا عىلىمي نەمەسە اكادەميالىق دارەجەسى بار, ال 13,3%-ى جوعارى ساناتتى پەداگوگتەر.
بايانداما اياسىندا ع.بەيسەمباەۆ ادىستەمەلىك ورتالىقتاردىڭ كادرلىق الەۋەتىنە, ۇيىمداستىرۋشىلىق-قۇقىقتىق مارتەبەسىنە, سونداي-اق ماتەريالدىق بازاسىنا توقتالدى. اتاپ ايتقاندا, ايماقتىق ادىستەمەلىك كابينەتتەردىڭ ۇيىمداستىرۋ-قۇقىقتىق ستاتۋسىن, اتاۋلارىن, جارعىلارى مەن ەرەجەلەرىن, شتاتتىق بىرلىكتەرىن بىرىزدىلەندىرۋ ماسەلەسى كوتەرىلدى. سونداي-اق, ادىستەمەلىك ورتالىقتاردىڭ ماتەريالدىق-تەحنيكالىق بازاسىن نىعايتۋ قاجەتتىگى اتاپ ءوتىلدى.
اكادەميا پرەزيدەنتى اتالعان ماسەلەلەرگە قاتىستى مىناداي نەگىزگى ۇسىنىمدار جاسادى.
– ءبىلىم بەرۋ ۇيىمدارىنا ادىستەمەلىك كومەك كورسەتۋ حالىقارالىق تاجىريبەسىن ەنگىزۋدى قولعا الۋدى ۇسىندى;
– «ۇزدىك ادىستەمەلىك ورتالىق» رەسپۋبليكالىق بايقاۋىن ۇيىمداستىرۋ;
- ادىستەمەلىك ورتالىقتار ءوز ايماقتارىندا پەداگوگيكالىق يننوۆاتسيا مەن زاماناۋي وزىق تاجىريبەلەردى تاراتۋدىڭ ورتالىعىنا اينالۋى ءتيىس.