قر پارلامەنتى ءماجىلىسىنىڭ دەپۋتاتتارى «قر تاۋەلسىزدىگىنىڭ وتىز جىلدىعىنا بايلانىستى راقىمشىلىق جاساۋ تۋرالى» زاڭ جوباسىن قاراۋعا كىرىستى, دەپ حابارلايدى Egemen.kz.
قاراستىرىلىپ وتىرعان قۇجاتتا العاش رەت الەۋمەتتىك جاعىنان وسال ادامدار ۇعىمى ەنگىزىلدى.
«زاڭ جوباسىندا قىلمىستىق تەرىس قىلىق جاساعان جانە زالال كەلتىرۋگە اكەپ سوقپاعان, نە ونى تولىق وتەگەن ازاماتتار مەن مەملەكەتتىڭ قاۋىپسىزدىگىنە قاتەر توندىرمەيتىن ونشا اۋىر ەمەس, سونداي-اق اۋىرلىعى ورتاشا قىلمىستار جاساعان سوتتالعانداردى جازادان بوساتۋ ۇسىنىلادى. سونداي-اق, زاڭ جوباسىندا قاراستىرىلعان ادامدار ءۇشىن نەگىزگى جازانىڭ مەرزىمى مەن مولشەرى قىسقارتىلادى», دەپ تۇسىندىرەدى قر ءىىم قىلمىستىق-اتقارۋ جۇيەسى كوميتەتى.
اتالعان توپتاعى ادامدار توبىن قاراۋ كەزىندە قالعان زالالدى تولىق وتەۋى, سونداي-اق وسى زاڭ قولدانىسقا ەنگىزىلگەن كۇنى جازاسىن وتەۋگە ءبىر جىلدان اسپايتىن ۋاقىت تەرىس مىنەز-ق ۇلىق دارەجەسىنىڭ بولماۋى ەسكەرىلەدى.
ءوز كەزەگىندە, زاڭ جوباسى جەرگىلىكتى اتقارۋشى ورگانداردىڭ ەڭبەككە قابىلەتتى ادامداردى جۇمىسقا ورنالاستىرۋىن قامتاماسىز ەتۋدە, سونداي-اق باس بوستاندىعىنان ايىرۋ ورىندارىنان بوساپ شىققاندارعا الەۋمەتتىك جانە وزگە دە كومەك كورسەتۋدە شارالار قابىلداۋىن كوزدەيدى.
قازاقستان رەسپۋبليكاسى تاۋەلسىزدىگىنىڭ وتىز جىلدىعىنا راقىمشىلىق جاساۋ كامەلەتكە تولماعاندارعا زورلىق كورسەتكەندەرگە, جەمقورلارعا, ادام ولتىرگەندەر مەن ەكسترەميستەرگە, قىلمىستىق توپتاردىڭ بۇرىنعى قاتىسۋشىلارىنا قاتىستى قولدانىلمايدى.
قاج كوميتەتىندە 30 جىل ىشىندە قازاقستاندا 8 راقىمشىلىق جاسالعانىن, سوڭعى 4 راقىمشىلىق قازاقستان رەسپۋبليكاسىنىڭ تاۋەلسىزدىك كۇندەرىنە ورايلاستىرىلعانىن اتاپ ءوتتى.