مەملەكەت مىقتى بولۋى ءۇشىن ەڭ الدىمەن حالىقتىڭ بىرلىگى مىعىم بولۋى كەرەك. ال حالىقتىڭ بىرلىگى مىقتى بولۋى ءۇشىن ونىڭ ءال-اۋقاتى, الەۋمەتتىك جاعدايى جاقسى بولۋى ءتيىس. ول ءۇشىن ءتيىستى رەفورمالار كەزەڭ-كەزەڭىمەن, ۋاقىتىندا ءجۇرىپ وتىرۋى قاجەت. وسىنداي ىرگەلى قادامداردىڭ بارلىعى مەملەكەت باسشىسى قاسىم-جومارت توقاەۆتىڭ حالىققا جولداۋىندا ايقىن كورىنىس تاۋىپ وتىر.
جولداۋدا مەملەكەت باسشىسى ەلىمىزدەگى عىلىم, ءبىلىم سالالارىن دامىتۋ ماسەلەلەرىنە دە ايرىقشا توقتالدى. ەل پرەزيدەنتىنىڭ ءوزى دە عالىم ادام. ق.توقاەۆ – ساياسي عىلىمدار دوكتورى, پروفەسسور, ماسكەۋ مەملەكەتتىك حالىقارالىق قاتىناستار ينستيتۋتىنىڭ تۇلەگى. بۇل ينستيتۋتتى جاقسى بىلەمىن. سەبەبى ءوزىم دە د.مەندەلەەۆ اتىنداعى ماسكەۋ حيميا-تەحنولوگيالىق ينستيتۋتىندا ءبىلىم العان ەدىم. سوندىقتان مەملەكەت باسشىسىن تەرەڭ ءبىلىمدى ادام دەپ تۇسىنەمىن. بۇل رەتتە پرەزيدەنتىمىز ءبىلىم مەن عىلىمعا وتە جاقسى كوڭىل ءبولىپ كەلە جاتىر.
ەل تىزگىنىن ۇستاعالى بەرگى جىلداردا پرەزيدەنت مەملەكەتىمىزدەگى جوعارى ءبىلىم بەرەتىن ۋنيۆەرسيتەتتەردىڭ قىزمەتىن رەتكە كەلتىردى. ەندىگى ماسەلە, ەلىمىزدەگى عىلىم سالاسىن دامىتۋ بولىپ وتىر. وسى ۋاقىتقا دەيىن قازاقستانداعى ءبىلىم وردالارىنىڭ سانىن قىسقارتۋمەن كەلدىك. بۇدان بىلاي قالىپتاسقان ءۇردىستى توقتاتىپ, جاقسى ۋنيۆەرسيتەتتەر اشۋ ماسەلەسىن العا قويعان ءجون بولار ەدى. ماسەلەن, وزىمىزگە كورشىلەس وزبەكستان مەملەكەتى 4 جىلدا جاڭادان 33 ۋنيۆەرسيتەت, 12 عىلىمي-زەرتتەۋ ينستيتۋتىن اشتى. مىنەكەي, بىزگە دە وسى جولعا ءتۇسۋ قاجەت.
ءبىزدىڭ كەيبىر زەرتتەۋلەرىمىز 1-2 جىلدىق, ءارى كەتسە 3 جىلدىق بولدى. عىلىمدا ءۇش جىل كولەمىندە اۋقىمدى ماسەلەلەر شەشىلمەيدى. بۇل – تىم از ۋاقىت. ماسەلەن, كەڭەس وكىمەتى كەزەڭىندە زەرتتەۋلەرگە 5 جىل بەرىلەتىن ەدى. انىعىندا وسىلاي بولۋى كەرەك. وكىنىشتىسى سول, وسى ۇردىستەن اجىراپ قالعان بولاتىنبىز. پرەزيدەنت سونى قايتا قالپىنا كەلتىرىپ, زەرتتەۋ ماسەلەسىن جۇيەلى جولعا قويدى. باستالعان دۇنيە سوڭىنا دەيىن جەتكىزىلۋى ءتيىس. وسىلايشا, عالىمداردىڭ جەمىسى تاجىريبەگە ەنگىزىلۋى كەرەك.
سونىمەن قاتار پرەزيدەنت «ەڭ الدىمەن, جەتەكشى عالىمدارىمىزعا تۇراقتى جانە ءوز ەڭبەگىنە لايىقتى جالاقى تولەۋ ماسەلەسىن شەشۋ كەرەك», دەي وتىرىپ, جەتەكشى عالىمداردى دا نازاردان تىس قالدىرعان جوق. جەتەكشى عالىم دەگەنىڭىز – ءاربىر عىلىمي مەكتەپتىڭ يەسى. ونداي عالىمداردىڭ ورنى ەرەكشە. عىلىمنىڭ تۇراقتى كۇشى دە وسى جەتەكشى عالىمدار. ويىمدى تۇيىندەيتىن بولسام, جولداۋدا نازارعا الىنعان ناق وسىنداي قادامدار عانا ەلىمىزدىڭ عىلىم سالاسىن العا باستىراتىنى انىق.
مۇرات جۇرىنوۆ,
ۇلتتىق عىلىم اكادەمياسىنىڭ پرەزيدەنتى