ءبىر اپتادان استام ۋاقىت بويى ءۇندىستاننىڭ سولتۇستىگىندەگى ۋتتار-پرادەش شتاتىندا بالالاردىڭ دەنە قىزۋى كوتەرىلىپ جاتىر. كوپشىلىگى بۋىنداعى اۋىرسىنۋ, باس اۋرۋى, شولدەۋ جانە جۇرەك اينۋىنا شاعىمدانعان. كەيبىرىنىڭ اياق-قولىنا بورتپە شىققان, دەپ جازادى Egemen.kz.
ۆۆس جازۋىنشا كەم دەگەندە 50 ادام بەزگەكتەن قايتىس بولدى, شتاتتىڭ شىعىس بولىگىندەگى التى اۋداندا بىرنەشە ادام اۋرۋحاناعا جاتقىزىلدى. زارداپ شەككەندەردىڭ ەشقايسىسى Covid-19 تەستىنە وڭ ناتيجە بەرمەدى.
ءۇندىستان كوروناۆيرۋستىڭ ەڭ قاۋىپتى ەكىنشى تولقىنىنان بىرتىندەپ قالپىنا كەلە باستاعان كەزدە, ەلدەگى تۇرعىنى ەڭ كوپ شوعىرلانعان ۋتتار-پرادەش شتاتىنداعى ءولىم حالىق اراسىندا «جۇمباق بەزگەك» تۋرالى دۇربەلەڭ تۋدىردى.
اگرا, ماتۋرا, ماينپۋري, ەتا, كاسگانج جانە فيروزاباد سىندى بىرنەشە زارداپ شەككەن اۋدانداعى دارىگەرلەر ءولىم-ءجىتىمنىڭ نەگىزگى سەبەبى - ماسالار تاسىمالدايتىن دەنگە بەزگەگى بولۋى مۇمكىن ەكەنىن ايتادى. ولاردىڭ ايتۋىنشا, كوپتەگەن پاتسيەنتتىڭ قانىندا ترومبوتسيتتەر سانى ازايىپ كەتكەن. بۇل دەنگە بەزگەگى اسقىنعاندا پايدا بولاتىن بەلگىلەردىڭ ءبىرى.
«ناۋقاستار, اسىرەسە بالالار, اۋرۋحانالاردا تەز ولەدى», دەيدى فيروزاباد اۋدانىنىڭ دەنساۋلىق ساقتاۋ سالاسىنداعى جوعارى لاۋازىمدى قىزمەتكەرى, دارىگەر نيتا كۋلشرەستا. اۋداندا سوڭعى اپتادا 40 ادام قايتىس بولدى, ونىڭ ىشىندە 32 بالا بار.
دەنگە بەزگەگى - انالىق ماسالار ارقىلى تارايتىن تروپيكالىق اۋرۋ. ول تۋرالى دەرەك ءۇندىستاندا جۇزدەگەن جىلدان بەرى بار. جالپى اتالعان اۋرۋ الەمنىڭ 100-دەن استام ەلىندە بار, الايدا شامامەن 70%-ى ازيادا تىركەلگەن. دەنگە بەزگەگىنىڭ ءتورت ۆيرۋسى بەلگىلى. بالالار ەرەسەكتەرگە قاراعاندا ەكىنشى دەنگە ينفەكتسياسىنان بەس ەسە ءجيى ولەدى.