قر توتەنشە جاعايلار مينيسترلىگى جامبىل وبلىسى كورولەۆكا كەنتىنىڭ اسكەري قويماسىنداعى ءورتتى سوندىرۋگە تىكۇشاق ۇسىنۋعا دايىن, دەپ حابارلايدى Egemen.kz.
بۇل تۋرالى مينيسترلىكتىڭ ءباسپاسوز قىزمەتى ءمالىم ەتتى.
«قر توتەنشە جاعدايلار مينيسترلىگى قورعانىس مينيسترلىگى رەسمي ۇندەۋ سالسا, ءورتتى ءسوندىرۋ ءۇشىن تىكۇشاقتار ۇسىنۋعا دايىن», دەپ جازىلعان رەسمي مالىمەتتە.
مينيسترلىكتىڭ دەرەگى بويىنشا, اسكەري قويماداعى توتەنشە وقيعانىڭ سالدارىن جويۋعا وزگە وڭىرلەردەن ماماندار تارتىلعان.
«الماتى قالاسىنان قۇرامىندا 6 تەحنيكا مەن جەكە قۇرامنىڭ 22 ادامى بار جاساق, تۇركىستان قالاسىنان اپاتتىق مەديتسينالىق ورتالىقتىڭ 1 تەحنيكاسى, شىمكەنت قالاسى توتەنشە جاعدايلار دەپارتامەنتىنىڭ 8 تەحنيكا مەن جەكە قۇرامنىڭ 33 ادامى بار جاساق جانە مينيسترلىكتىڭ اپاتتىق مەديتسينا ورتالىعىنىڭ قىزمەتكەرلەرى كەلىپ جەتتى. قر توتەنشە جاعدايلار مينيسترلىگىنىڭ كۇشتەرى مەن قۇرالدارى قالعان ءورت وشاقتارىن سوندىرۋگە, تۇرعىنداردى تۇراقتى ورنالاسۋ ورنىنا قايتارۋعا جانە تەمىرجول مەن اۆتوموبيل جولدارىن قالپىنا كەلتىرۋگە تارتىلاتىن بولادى», دەپ جازىلعان ءباسپاسوز قىزمەتىنىڭ مالىمەتىندە.