بىرنەشە ەل كابۋل اۋەجايىندا لاڭكەستىك شابۋىل قاۋپى جوعارى ەكەنىن ايتىپ, ءوز ازاماتتارىنا ول جاققا بارماۋدى ەسكەرتتى, دەپ جازادى Egemen.kz.
اۆستراليا, اقش جانە ۇلىبريتانيا كابۋل اۋەجايىندا جۇرگەن ازاماتتارىنا ەسكەرتۋ جاساپ, تەز ارادا ول جەردەن كەتۋگە كەڭەس بەردى.
تاليباندار باسىپ العالى بەرى كابۋلدان 82 مىڭنان استام ادام ەۆاكۋاتسيالاندى. ەلدەر 31 تامىزعا دەيىن قالعان زاماتتارىن كوشىرىپ الۋعا تىرىسىپ جاتىر. مىڭداعان ادام ءالى دە ەلدەن ۇشىپ كەتۋگە ۇمىتتەنىپ, اۋەجاي ماڭىندا كۇتىپ وتىر.
اقش مەملەكەتتىك حاتشىسى ەنتوني بلينكەننىڭ ايتۋىنشا, تالىپتەر ەۆاكۋاتسيا مەرزىمنىڭ ۇزارتىلۋىنا قارسى بولدى, بىراق سونىمەن بىرگە شەتەلدىكتەر مەن اۋعاندىقتاردىڭ 31 تامىزدان كەيىن دە ەلدەن كەتۋىنە رۇقسات ەتۋگە ۋادە بەرگەن.
اۆستراليا سىرتقى ىستەر ءمينيسترى مەريس پەين بەيسەنبىدە «تەرروريستىك شابۋىلدىڭ تۇراقتى جانە وتە جوعارى قاۋپى بار» ەكەنىن ەسكەرتتى.
بۇنىڭ الدىندا اقش مەملەكەتتىك دەپارتامەنتى دە ساراي قاقپاسىندا, شىعىس نەمەسە سولتۇستىك قاقپالارىندا كۇتىپ تۇرعان ادامداردى تەز ارادا تاراۋعا شاقىرعان ەدى.
ۇلىبريتانيا دا ازاماتتارىن قاۋىپسىز جەرگە كوشۋگە جانە ەۆاكۋاتسيا تۋرالى كەڭەستەردى كۇتۋگە ۇندەدى. سىرتقى ىستەر مينيسترلىگى اۋعانستانداعى جاعداي تۇراقسىز ەكەنىن, لاڭكەستىك شابۋىلدىڭ قاۋپى كۇشتى ەكەنىن ايتتى.
ەلدەردىڭ ەشقايسىسى ءتونىپ تۇرعان قاۋىپ تۋرالى قوسىمشا اقپارات بەرمەدى.