د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ ينفراقۇرىلىمى ستۋدەنتتەردى ءداستۇرلى وقىتۋ فورماتىندا قابىلداۋعا تولىعىمەن دايىن. بۇل تۋرالى ۋنيۆەرسيتەتتىڭ باسقارما توراعاسى – رەكتورى جاسۇلان شايماردانوۆ ءبىلىم شاڭىراعىنىڭ جاڭا وقۋ جىلىنا دايىندىعى تۋرالى بريفينگ بارىسىندا ايتتى.
ءبىلىم ورداسىنىڭ رەكتورى جاسۇلان شايماردانوۆتىڭ ايتۋىنشا, پروفەسسورلىق-وقىتۋشىلار قۇرامى مەن قىزمەتكەرلەردىڭ 98%-ى ۆاكتسينا الدى. قىزمەتكەرلەر مەن وقىتۋشىلاردى ۆاكتسينالاۋعا تارتۋ ءۇشىن ءتۇسىندىرۋ جۇمىستارى مەن ىنتالاندىرۋ شارالارى جۇرگىزىلگەن. ۆاكتسينا العان 500-گە جۋىق قىزمەتكەرگە سىياقى تۇرىندە ماتەريالدىق كومەك بەرىلدى.
– ۆاكتسينالاۋ ماسەلەلەرى بويىنشا ءتۇسىندىرۋ جۇمىستارى جۇيەلى تۇردە جۇرگىزىلىپ, مەديتسينا قىزمەتكەرلەرىمەن ونلاين كەزدەسۋلەر ۇيىمداستىرىلدى. سونىڭ ناتيجەسىندە قازىر ستۋدەنتتەردىڭ اراسىندا ۆاكتسينالاۋ قارقىندى جۇرۋدە, – دەدى جاسۇلان قۇدايبەرگەن ۇلى.
بيىلعى وقۋ جىلىندا ۆاكتسينا العان اقىلى ءبولىمنىڭ ستۋدەنتتەرى ءۇشىن وقۋعا 5% جەڭىلدىك قاراستىرىلعان. سونىمەن قاتار ستۋدەنتتەر اراسىندا سىيلىق سەرتيفيكاتتارىنىڭ ۇتىس ويىنى وتكىزىلىپ, 60 ستۋدەنت قارجىلاي سەرتيفيكاتقا يە بولدى. اقشالاي جۇلدەلەر ۇتىس ويىنىندا 70 ستۋدەنتكە بەرىلمەك. الداعى قىركۇيەك ايىندا ستۋدەنتتەردىڭ اباي جەرىنە تۋريستىك ساپارى جانە «پروستور» جازعى ەكسپەديتسيالىق كامپۋسىندا تيمبيلدينگ وتكىزۋ جوسپارلانىپ وتىر.
سانيتارلىق دارىگەردىڭ قاۋلىسىنا سايكەس شەكتەۋ شارالارى ەنگىزىلىپ, جاتاقحانا, كىتاپحانا, بارلىق وقۋ كورپۋستارىنا وقىتۋشىلار مەن ستۋدەنتتەر Ashyq جۇيەسى ارقىلى كىرەدى.
ۋنيۆەرسيتەت باسشىسى ايتىپ وتكەندەي, وقۋ كورپۋستارى مەن جاتاقحانالار سانيتايزەر, دەزينفەكتسيالىق جانە كۆارتستاۋعا ارنالعان شامدارمەن, دەزينفەكتسيالىق كىلەمشەلەرمەن قامتاماسىز ەتىلگەن. مەديتسينالىق پۋنكت بارلىق قاجەتتى پرەپاراتپەن جابدىقتالعان. ستۋدەنتتەر مەن قىزمەتكەرلەردىڭ دەنساۋلىق جاعدايىن باقىلاۋ ءۇشىن «وليمپ» زەرتحاناسىمەن كەلىسىمشارت جاسالىپ, COVID-19 تەستىلەرىن جەدەل وتكىزۋ ءۇشىن ەكسپرەسس-تەستتەر ساتىپ الىندى.
سانيتارلىق-ەپيدەميالىق قاۋىپسىزدىكتى قامتاماسىز ەتۋ ماقساتىندا جاسالعان رەگلامەنت بويىنشا كىرەبەرىستەردە دەزينفەكتسيالىق توننەلدەر ورناتىلعان. ماسكالىق رەجىم, تەرموگرافيالىق باقىلاۋ, عيماراتتى سانيتارلىق وڭدەۋ كەستەگە سايكەس جۇزەگە اسىرىلادى. بارلىق اۋديتوريالار مەن زەرتحانالاردا, اسحانا مەن كىتاپحانادا قاشىقتىق ساقتاۋ تاڭبالارى جاسالدى. دارىگەردىڭ كەزەكشىلىگى ۇيىمداستىرىلىپ, جاتاقحانادا ستۋدەنتتەردىڭ دەنساۋلىعىنا كۇندەلىكتى مونيتورينگ جۇرگىزىلەدى.
كىتاپحانانىڭ وقۋ زالى كەڭ جانە كوپفۋنكتسيونالدى. ستۋدەنتتەر كىتاپحانا قورىنا ەركىن قول جەتكىزە الادى. قاجەتتى كىتاپتاردى ءوز بەتىمەن الۋعا, تىركەۋگە جانە پايدالانۋعا جاعداي جاسالعان.
ۋنيۆەرسيتەتتىڭ باسقا قالا-اۋدانداردان كەلگەن ستۋدەنتتەرگە ارنالعان 1500-دەن اسا ورىندىق ءۇش جاتاقحاناسى بار. بۇل جاتاقحاناعا قاجەتتىلىكتى تولىعىمەن جابادى. بولجام بويىنشا جاتاقحاناعا قاجەتتىلىك – 985 ورىن, ونىڭ ىشىندە «سەرپىن» باعدارلاماسىمەن وقيتىن 178 ستۋدەنت بار.
جاز بويى جاتاقحانا بولمەلەرىندە, جىلۋ جانە سۋ جۇيەسىنە, تۇرمىستىق تەحنيكاعا اعىمداعى جوندەۋ جۇرگىزىلىپ, جاڭا جيھازدار جاسالدى. بارلىق جاتاقحانالاردا فيتنەس زالدارى جابدىقتالعان.
ۋنيۆەرسيتەتتىڭ اكادەميالىق قىزمەت جونىندەگى پرورەكتورى جادىرا قوڭىرباەۆا ءتۇسىندىرىپ وتكەندەي, بيىل ستۋدەنتتەر باكالاۆريات, ماگيستراتۋرا جانە دوكتورانتۋرادا ارالاس وقىتۋ فورماتى بويىنشا ءبىلىم الادى: دارىستەر ونلاين, تاجىريبەلىك جانە زەرتحانالىق ساباقتار وفلاين وتەدى.
پاندەردىڭ ەلەكتروندىق مازمۇنىن وقىتۋشىلار Oren Edx, MOODLE ۆكتۋ, Google Classroom پلاتفورمالارىندا جۇكتەدى. ستۋدەنتتەر اپتا سايىن بەينەماتەريال تۇرىندە بەرىلگەن دارىستەرمەن ءوز بەتىنشە تانىسادى جانە تاقىرىپ بويىنشا وقيدى. دارىسكە قاتىسۋ ارنايى جۇيەلەرمەن باقىلانادى. ال تاجىريبەلىك ساباقتار قوڭىراۋلاردىڭ يكەمدى كەستەسىمەن جانە ەكى اۋىسىممەن, ساباقتار اراسىنداعى ءارتۇرلى ۋاقىتتاعى ۇزىلىستەرمەن وتەدى.
ستۋدەنتتەر اۋديتوريادا 2 مەتر, زەرتحانادا 5 مەتر الەۋمەتتىك قاشىقتىقتى ساقتاي وتىرىپ, شاحمات تارتىبىمەن وتىرادى. اۋديتوريالاردىڭ تولىمدىلىعى 50%-دان اسپايدى. وقۋ پراكتيكاسى تەوريالىق وقىتۋعا بىرىكتىرىلگەن جانە ستۋدەنتتەر بازالىق ينجەنەرلىك بىلىكتىلىكتەردى ۋنيۆەرسيتەتتىڭ قۇزىرەتتىلىك ورتالىقتارىندا الا الادى.
– فيزيكا مەن حيميا پاندەرىنىڭ زەرتحانالىق جۇمىستارعا الدىن الا جازىلادى. زەرتحانانىڭ جۇمىس كەستەسىن, جۇمىستىڭ ادىستەمەلىك نۇسقاۋلىقتارىن ءبىلىم بەرۋ پورتالىندا ورنالاسقان EKTU-LAB پاراقشاسى ارقىلى بىلۋگە بولادى. وندا الدىن الا جازىلىپ, زەرتحانالىق جۇمىستاردىڭ ورنى مەن ۋاقىتىن برونداۋعا بولادى, – دەدى پرورەكتور جادىرا قوڭىرباەۆا.
دەنە شىنىقتىرۋ ءپانى بويىنشا وقۋ پروتسەسىن ۇيىمداستىرۋ كەزىندە ستۋدەنتتەرگە «تاڭداۋ», «كوماندا», «دەنساۋلىق», «كاسىپقوي» باعدارلامالارىنىڭ ءبىرىن تاڭداۋ ۇسىنىلادى. وقۋ جۇكتەمەسىندە دەنە شىنىقتىرۋمەن اينالىسۋدان باسقا, دارىندى ستۋدەنتتەردى انىقتاۋ, ولاردى سپورت سەكتسيالارىنا تارتۋ, جوعارى دەڭگەيدەگى جارىستارعا دايىنداۋ ۇيىمداستىرىلادى. ماسەلەن, «كوماندا» باعدارلاماسى بويىنشا ستۋدەنتتەر سپورتتىڭ 15 ءتۇرى بويىنشا جىل سايىنعى ۋنيۆەرسياداعا دايىندالادى. «دەنساۋلىق» باعدارلاماسىنداعى ساباقتارعا انىقتاما بويىنشا بوساتىلعان ستۋدەنتتەر قاتىسادى. ال «كاسىپقوي» باعدارلاماسى كاسىبي سپورت تۇرلەرىمەن اينالىساتىن سپورت شەبەرىنە ۇمىتكەر ستۋدەنتتەرگە ارنالعان.
ايجانات باقىتقىزى