بيىل 19 قاڭتاردا قازاقستاندىق اۋىراتلەت نيجات راحيموۆ انتيدوپينگ ەرەجەلەرىن بۇزدى دەگەن كۇدىككە ءىلىنىپ, جارىستاردان ۋاقىتشا شەتتەتىلدى, دەپ حابارلايدى Egemen.kz.
حالىقارالىق دوپينگ-تەستىلەۋ اگەنتتىگىنىڭ ء(ىتا) شەشىمىنە سايكەس, راحيموۆ 2016 جىلى دوپينگ تەكسەرۋ ءۇشىن تاپسىرعان نەسەپ تالداۋىن اۋىستىردى دەگەن كۇدىككە ءىلىندى. سول جىلى ول ريو-دە-جانەيرودا وتكەن وليمپيادا چەمپيونى بولعان.
بۇگىن اۋىراتلەت نيجات راحيموۆ دوپينگ داۋىنا قاتىستى سوت وتىرىسى الدىندا جانكۇيەرلەرگە ارنايى مالىمدەمە جاسادى.
«ەرتەڭ مەنى سىنامالاردى اۋىستىردى دەپ ايىپتاعان ىسكە بايلانىستى وتىرىس وتەتىنىن حابارلاعىم كەلەدى. قاڭتار ايىنان بەرى ءبىزدىڭ فەدەراتسيا تاجىريبەلى ادۆوكاتتارمەن ادال سپورتشى ەكەنىمدى قورعاپ قالۋعا كومەكتەسىپ جاتىر. ارينە, مۇنى جازۋ مەن ءۇشىن قيىن. بىراق ماعان ءدال قازىر سىزدەردەن قاتتى قولداۋ قاجەت. سوت وتىرىسىنىڭ ناتيجەسى قانداي بولاتىنى - جاراتۋشىعا عانا ايان. مەنى سپورتتان شەتتەتە مە, وليمپيادا ويىندارىنىڭ جۇلدەسىن تارتىپ الا ما, ول جاعى بەلگىسىز. ءبىر نارسە ايتقىم كەلەدى, مەن ءبارىن ەرەجە بويىنشا جاسادىم. ال تەست الۋ قالاي وتكەنىن بىلمەيمىن. ونى مامانداردىڭ ۇياتى بىلەدى», دەيدى وليمپيادا چەمپيونى.
نيجات راحيموۆ ارادا بەس جىل وتكەن سوڭ سىنامانى قايتا قاراپ, كىنا تاققانى ادىلەتسىز دەپ ەسەپتەيدى.
«اۋىر اتلەتكا - ءومىر بويى اينالىسىپ كەلە جاتقان جۇمىسىم. بۇل جولدى تاڭداعانىما ەش وكىنبەگەنمىن. ءوزىمدى سىيلايمىن, بىرنەشە جىلدان بەرى قاسىمدا جۇرگەن ادامداردى سىيلايمىن. سىزدەر مەنى تەك جەڭىسكە جەتكەن ساتتە عانا ەمەس, وسىنداي قيىن شاقتا دا قولدايدى دەپ سەنەمىن. بۇل قيىن سىناقتان ءوتۋىم كەرەك. ءوزىم ءۇشىن, قازاقستان ءۇشىن جەڭىسكە جەتۋىم كەرەك», دەپ جازدى نيجات راحيموۆ.