رەسەي قورعانىس مينيسترلىگى اۋعانستاننان رەسەي, ۋكراينا جانە ۇجىمدىق قاۋىپسىزدىك تۋرالى شارت ۇيىمىنا مۇشە باسقا دا ەلدەردىڭ ازاماتىن كوشىرەدى, دەپ حابارلايدى Egemen.kz.
ريا نوۆوستي اگەنتتىگىنىڭ حابارلاۋىنشا, رەسەي قورعانىس ءمينيسترى سەرگەي شويگۋ پرەزيدەنت ۆلاديمير ءپۋتيننىڭ تاپسىرماسى بويىنشا اۋعانستاننان 500-دەن استام رەسەي, ۋكراينا جانە ۇقشۇ-عا مۇشە باسقا ەلدەردىڭ ازاماتتارىن اسكەري ۇشاقتارمەن ەۆاكۋاتسيالاۋدى ۇيىمداستىرادى.
تاپسىرمانى ورىنداۋ ءۇشىن ۋليانوۆسك اەرودرومىندا ورنالاسقان ءتورت اسكەري كولىك ۇشاعىنان تۇراتىن اۋە توبى قۇرىلعان. بورتتا اسكەري-مەديتسينالىق بريگادالار, سونداي-اق سۋ, ازىق-ت ۇلىك جانە كورپە بار.
اسىرەسە سوڭعى اپتالاردا تاليبان (قازاقستاندا جانە باسقا ەلدەردە تىيىم سالىنعان ۇيىم) اۋعانستانداعى ءىرى قالالاردى باسىپ الىپ, 15 تامىزدا كابۋلعا كىرگەن كەزدە ەلدەگى جاعداي شيەلەنىسە ءتۇستى. اۋعانستان پرەزيدەنتى اشراف عاني «قىرعىندى بولدىرماۋ ءۇشىن» ەلدەن كەتكەنىن مالىمدەدى. 16 تامىزعا قاراعان ءتۇنى «تاليبان» ساياسي كەڭسەسىنىڭ وكىلى موحامماد نايم اۋعانستانداعى سوعىس اياقتالعانىن, شتاتتاعى باسقارۋ فورماسى جاقىن ارادا بەلگىلى بولاتىنىن ايتتى.
بىرقاتار ەل, سونىڭ ىشىندە اقش, ۇلىبريتانيا جانە گەرمانيا كابۋلداعى جالعىز اۋەجاي ارقىلى ءوز ازاماتتارى مەن اۋعانداردى ەۆاكۋاتسيالادى. تاليباندار سەيسەنبىدە ەۆاكۋاتسيا 31 تامىزعا دەيىن اياقتالۋى ءتيىس ەكەنىن, سودان كەيىن وعان تىيىم سالىناتىنىن ايتتى.