قر ءبىلىم جانە عىلىم ءمينيسترى اسحات ايماعامبەتوۆ نارتاي ارالباي ۇلىنا بەرگەن سۇحباتىندا جاڭا وقۋ جىلىنىڭ ءداستۇرلى فورماتتا وتەتىنىن, الايدا ونىڭ بۇرىنعى وقۋ جۇيەسىنەن ايىرماشىلىعى بولاتىنىن ايتتى, دەپ جازادى Egemen.kz.
ء«بىلىم سالاسىندا كارانتين وتكەن جىلدىڭ 16 ناۋرىزىندا باستالدى. بارلىق وقۋ ورنى ونلاين فورماتقا سول كەزدە كوشكەن ەدى. ال سول 16 ناۋرىزعا دەيىن بولعان فورماتتى قايتا جالعاستىرۋ مۇمكىن ەمەس. ويتكەنى بىزدە ءبىراز وزگەرىس پايدا بولدى», دەدى مينيستر.
اسحات ايماعامبەتوۆتىڭ تۇسىندىرۋىنشە, ەندى كەيبىر ساباقتاردى ونلاينعا وتكىزۋ, ءارتۇرلى ەلەكتروندى قۇرىلعىلاردى پايدالانۋعا بولادى. وتكەن جىلى مۇعالىم, ستۋدەنت, وقۋشىلاردىڭ تسيرلىق قۇزىرەتتىلىگى الدەقايدا دامىدى.
«سوندىقتان ءبىز سول 2020 جىلى بولعان ءداستۇرلى فورماتقا كوشپەيمىز, سول جىلى جيعان-تەرگەن تاجىريبەمىزدى جاڭا تەحنولوگيالاردى قولدانا وتىرىپ, وفلاين فورماتتا قولدانامىز. ول نەنى بىلدىرەدى؟ مىسالى جوو-دا كەيبىر پاندەردى ءالى وسىلاي ونلاين فورماتتا وتكىزۋگە بولادى دەگەن تۇجىرىمداماعا كەلدىك. مەكەپتە ءىت ءپانىنىڭ تەوريالىق ءبولىمىن ونلاين فورماتتا وتكىزۋگە بولادى. ەكىنشىدەن, قاشىقتان وقىعاندا ء بىلىم ساپاسىندا ءارتۇرلى اقاۋ بولدى, ونى جاسىرا المايمىز. ونلاين فورمات پەن ءداستۇرلى فورماتتى سالىستىرۋعا بولمايدى. ءبىز جاڭا وقۋ جىلىن باستاعاندا وقۋشىلاردىڭ ونلاين وقۋدان كەلگەنىن ەسكەرۋىمىز كەرەك. سوندىقتان جاڭا وقۋ جىلىن ءبىلىم بەرۋ باعدارلامالارىن بەيىمدەۋ ارقىلى باستايتىن بولامىز», دەدى مينيستر.
ءمينيستردىڭ ايتۋىنشا, جىل باسىندا مۇعالىمدەر وقۋشىلارعا ساراپتاما جاسايدى. الدىڭعى وقۋ جىلىندا بالا قاي تاقىرىپتاردى يگەرمەدى, سونى انىقتايدى. سول تاقىرىپتاردى قامتىپ, پىسىقتايدى.