كۇدىكتى وقۋ ورداسىنان 9 نوۋتبۋك, 3 پلانشەت, 3 ۆەبكامەرا جانە 3 قۇلاققاپ ۇرلاعان, دەپ حابارلايدى Egemen.kz اقمولا وبلىستىق پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
ۆەدومستۆونىڭ مالىمەتىنشە, بيىل 17 تامىزدا وبلىس ورتالىعىنداعى ۋچاسكەلىك پوليتسيا ينسپەكتورىنا جەرگىلىكتى مەكتەپتەردىڭ ءبىرىنىڭ ديرەكتورىنان ارىز ءتۇستى.
ديرەكتوردىڭ سوزىنشە, بيىلعى جىلعى تامىزدىڭ 13-15 كۇندەرى ارالىعىندا مەكتەپتەن 9 نوۋتبۋك, 3 پلانشەت, 3 ۆەبكامەرا جانە 3 قۇلاققاپتى بەلگىسىز بىرەۋ قولدى قىلعان. كەلتىرىلگەن شىعىن كولەمى 1,4 ميلليون تەڭگەدەن اسادى.
«جەدەل ىزدەستىرۋ شاراسى بارىسىندا مەكتەپتىڭ ءۇش كۇزەتشىسىنىڭ ءبىرى ۇستالدى. 28 جاستاعى ەر ادام قىلمىسىن مويىندادى», دەدى ۆەدومستۆودان.
قازىرگى كەزدە, وسى قىلمىسقا قاتىستى قىلمىستىق كودەكستىڭ 188 بابىنىڭ 1-ءشى بولىگى «ۇرلىق» بويىنشا سوتقا دەيىنگى تەرگەۋ امالدارى جۇرگىزىلۋدە.