13-15 تامىز كۇندەرى بۋداپەشت ماڭىنداعى بۋگاتس قالاشىعىندا تۇركى-عۇن مادەنيەتى مەن ءداستۇرىن جاڭعىرتۋعا باعىتتالعان ءداستۇرلى «بابالار كۇنى» شاراسى ءوتتى, دەپ حابارلايدى Egemen.kz قازاقپاراتقا سىلتەمە جاساپ.
2011 جىلدان بەرى وتكىزىلىپ كەلە جاتقان شارانىڭ ۇيىمداستىرۋشىسى – «ماجار-تۇران» قورى. وعان ماجارستان, موڭعوليا, تۇركيا, ازەربايجان, ۋكراينا, اۋستريا, گەرمانيا, سەربيادا تۇرىپ جاتقان تۇركى حالىقتارى قاتىسادى.
شارا ەرتە تۇركى-عۇن مادەنيەتى مەن ءداستۇرىن جاڭعىرتۋعا باعىتتالعان.
قازاقستان ەلشىلىگىنىڭ ءبىرىنشى حاتشىسى ەدىل مىرزاحانوۆتىڭ ايتۋىنشا, ءجۇز مىڭنان استام ادامنىڭ باسىن قوساتىن «بابالار كۇنى» – ەكى ەل اراسىنداعى مادەني, عىلىمي ىنتىماقتاستىقتى دامىتۋعا, باۋىرلاس حالىقتاردىڭ بىرلىگىن نىعايتۋعا ىقپال ەتەدى.
ايتۋلى شارادا الەمنىڭ ەڭ ۇزدىك ساداقشىلارى ونەر كورسەتىپ, يت جۇگىرتىپ, قۇس سالۋ سىندى ساياتشىلىق ءداستۇر دارىپتەلدى.
شارا بارىسىندا الەمدەگى ەڭ ۇلكەن كيىز ءۇي «ەدىل قاعان» شاتىرى تىگىلدى. ونىڭ ىشىندە ماجار عالىمدارىنىڭ عۇن مەن اۆار مۇراسىن ۇسىناتىن ارحەولوگيالىق, انتروپولوگيالىق ەڭبەگى كوپشىلىك نازارىنا ۇسىنىلدى.
تۇركى حالىقتارىنىڭ اۋەنى شىرقالىپ, كونتسەرت قويىلدى.