شەتەلدىك ازاماتتار ءۇشىن ەمحاناعا تىركەلۋ ەرەجەسى وزگەردى

«نۇر-سۇلتان قالاسى بويىنشا مەديتسينالىق ساقتاندىرۋ قورىنىڭ مەديتسينالىق قىزمەت جەتكىزۋشىلەرىنىڭ اراسىندا 36 ۇيىم  العاشقى مەديتسينالىق-سانيتاريالىق كومەك كورسەتەدى. ولاردىڭ 18-ءى – مەملەكەتتىك, قالعانى –جەكەمەنشىك كلينيكالار», دەپ حابارلايدى  «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالىنىڭ ءباسپاسوز قىزمەتى. 

مەديتسينالىق-سانيتاريالىق العاشقى كومەك كورسەتەتىن مەديتسينالىق ۇيىمدارعا تىركەلۋ تارتىبىنە وزگەرىستەر ەنگىزىلدى. ولار تەك شەتەلدىك ازاماتتار مەن ەڭبەك ميگرانتتارىنا قاتىستى.

جاڭا قاعيدالارعا سايكەس, ەلدىڭ اۋماعىندا ۋاقىتشا بولاتىن نەمەسە باسپانا ىزدەپ جۇرگەن ازاماتتىعى جوق شەتەلدىك ادامداردى ەمحاناعا تىركەۋ ەرىكتى مەديتسينالىق ساقتاندىرۋ (ەمس) شارتىنىڭ نەگىزىندە جانە ونىڭ قولدانىلۋ مەرزىمى ارالىعىندا عانا جۇزەگە اسىرىلادى. قولدانىلۋ مەرزىمى اياقتالعاننان كەيىن ولار مەديتسينالىق ۇيىمنان اۆتوماتتى تۇردە شىعارىلادى.

ەاەو-عا مۇشە مەملەكەتتەردەن كەلگەن ەڭبەك ميگرانتتارىنىڭ مىندەتتى تۇردە مساك قىزمەتتەرىنە ەرىكتى مەديتسينالىق ساقتاندىرۋى بولۋى قاجەت.

ەمحاناعا تىركەۋگە ءوتىنىش ەركىن نىساندا قازاق نەمەسە ورىس تىلىندە, جەكە باسىن كۋالاندىراتىن قۇجاتتى نەمەسە شەتەلدىك تولقۇجاتتى قوسا بەرە وتىرىپ, ۇسىنىلادى. ءوتىنىش بەرۋشى مەديتسينالىق ۇيىمعا جەكە ءوتىنىش بەرۋى كەرەك نەمەسە ول ءۇشىن ەرىكتى مەديتسينالىق ساقتاندىرۋ شارتىن جاساسقان ساقتاندىرۋ ۇيىمىنىڭ وكىلدەرى مۇنى جاساۋى كەرەك. ازاماتتار الەۋمەتتىك مەديتسينالىق ساقتاندىرۋ قورىنىڭ جەتكىزۋشىلەرىنە نەمەسە دەنساۋلىق ساقتاۋ مينيسترلىگىنىڭ اقپاراتتىق جۇيەلەرىمەن ينتەگراتسيالانعان مەديتسينالىق ۇيىمدارعا تىركەلۋگە بولادى.

قر اۋماعىنا ۋاقىتشا كەلگەن شەتەلدىكتەر مەن ولاردىڭ وتباسى مۇشەلەرى ءمامس جۇيەسىندە قازاقستاندىق ازاماتتارمەن بىردەي قۇقىقتاردى پايدالانادى.

قر ازاماتتارى, قانداستار جانە قر اۋماعىندا تۇراقتى تۇراتىن شەتەلدىكتەر ءۇشىن ەمحاناعا تىركەلۋ ءتارتىبى وزگەرىسسىز قالادى. 

ەمحاناعا قالاي تىركەلۋ كەرەك؟

ءبىرىنشى ءادىس (بارلىعى ءۇشىن).

ەلەكتروندىق ۇكىمەتتىڭ ۆەب-پورتالى ارقىلى ەمحاناعا تىركەلۋ www.egov.kz. «دەنساۋلىق ساقتاۋ» بولىمىندە «مەديتسينالىق-سانيتاريالىق العاشقى كومەك كورسەتەتىن مەديتسينالىق ۇيىمعا تىركەلۋ» قىزمەتىن تاڭداۋ قاجەت. ورىستەردى تولتىرۋ ارقىلى مەديتسينالىق ۇيىمعا ءوتىنىش بەرۋ كەرەك. پاتسيەنت تۋرالى مالىمەتتەردى ەمحانا مەملەكەتتىك اقپاراتتىق جۇيەلەردەن اۆتوماتتى تۇردە الادى. جاۋاپ وڭ بولعان جاعدايدا ازاماتقا مەديتسينالىق ۇيىمنىڭ ەتسق-سى قويىلعان ەلەكتروندىق قۇجات تۇرىندە ەمحاناعا تىركەلگەنى تۋرالى حابارلاما جىبەرىلەدى.

ەكىنشى ءادىس (حالىقتىڭ جەكەلەگەن ساناتتارى ءۇشىن).

ەركىن نىسانداعى ءوتىنىش پەن جەكە باسىن كۋالاندىراتىن قۇجات ۇسىنۋ ارقىلى ەمحاناعا بارىپ تىركەلۋگە بولادى. بۇل ءادىس زاڭ بويىنشا زەينەتكەرلەرگە, مۇگەدەكتەرگە, ولاردىڭ قامقورشىلارىنا, سونداي-اق پاترونات تاربيەشىلەرگە, كولونيادا جازاسىن وتەپ جاتقاندارعا, ستۋدەنتتەرگە, مەرزىمدى اسكەري قىزمەتشىلەرگە, شەت مەملەكەتتەردە تۋىلعان بالالارعا جانە سەنىمحات بويىنشا تىركەۋدى جۇزەگە اسىراتىن ادامدارعا عانا قول جەتىمدى.

قاشان تىركەلۋ كەرەك؟

قازاقستاندا جىل سايىن 15 قىركۇيەكتەن 15 قاراشاعا دەيىن مساك مەديتسينالىق ۇيىمدارىنا حالىقتى ەركىن تىركەۋ ناۋقانى جۇرگىزىلەدى. مەديتسينالىق كومەك الۋ ءۇشىن تىركەلۋدىڭ مارتەبەسىن تىكەلەي تۇرعىلىقتى جەرى بويىنشا ەمحانادا نەمەسە ەلەكتروندىق ۇكىمەت ۆەب-پورتالىندا ەتسق ارقىلى تەكسەرۋ ۇسىنىلادى. تىركەلۋ نەمەسە قايتا تىركەلۋ كەزىندە ەمحانانى تۇرعىلىقتى جەرىنە جاقىن جەردەن تاڭداۋ ۇسىنىلادى, قاجەت بولعان جاعدايدا ۋچاسكەلىك دارىگەر ناۋقاسقا ۇيگە بارا الادى. بۇل اسىرەسە پاندەميا كەزىندە وتە ماڭىزدى.

«ناۋقان كەزىندە مساك ۇيىمىنا تىركەلە وتىرىپ, ازاماتتار مەديتسينالىق كومەكتى 2022 جىلدىڭ 1 قاڭتارىنان باستاپ الا باستايدى. ياعني, وسى جىلدىڭ 31 جەلتوقسانىنا دەيىن ازاماتتارعا بۇرىن تىركەلگەن ەمحانادا قىزمەت كورسەتىلەدى», دەپ ءتۇسىندىردى الەۋمەتتىك مەديتسينالىق ساقتاندىرۋ قورىنىڭ ەلوردا فيليالى.

تىركەۋ ناۋقانى دەنساۋلىق ساقتاۋ سۋبەكتىلەرىنىڭ دەرەكقورىندا تىركەلگەن جانە تمككك جانە ءمامس بويىنشا مەديتسينالىق قىزمەتتەر كورسەتۋگە ۇمىتكەر مەديتسينالىق ۇيىمدار اراسىندا عانا جۇرگىزىلەدى.تىركەلۋگە قولجەتىمدى ەمحانالاردىڭ تىزىمىمەن قوردىڭ www.fms.kz سايتىندا «ەمحانانى تاڭداۋ» بولىمىندە تانىسۋعا بولادى.