...وي بولىسەدى
اۋىلىمىزدىڭ ىرگەسى بەرىك, ءتۇتىنى ءتۇزۋ
كەڭەس وداعى ىدىراعان سوڭ اۋىلدان بەرەكە كەتە باستادى دەيتىندەر كوپ. بۇل ءسوز نەگىزسىز دە ەمەس. ويتكەنى ومىرىمىزگە دەندەپ ەنگەن نارىقتىق ەكونوميكانىڭ زاڭى اسا قاتال. وكىمەت ولتىرمەيدى دەيتىن قاتاڭ كوزقاراستان ارىلىپ, اركىم وزىنشە تىربانىپ تىرشىلىك ەتپەسە, الداعى كۇنىڭ ب ۇلىڭعىر بولماق.
اۋىل – قازاقىلىقتىڭ قايماعى بۇزىلماعان التىن قازىناسى, ۇلتتىڭ ۇستىنى. «اۋىل – التىن بەسىگىمىز». اۋىل جوق جەردە قازاق تا جوق. سوندىقتان اۋىلدى ساقتاپ قالۋدىڭ ماڭىزى اسا جوعارى.
وسى جەردە مەنىڭ ايتپاعىم, ءبىزدىڭ اۋىلدىڭ ىرگەسى بەرىك, ءتۇتىنى ءتۇزۋ. قاڭىراپ بوس قالعان بىردە-ءبىر ءۇي جوق. قايتا ۇيلەرىن جاڭالاپ, ەرتەڭگى كۇندەرىنە بەك سەنىمدى ەكەندىكتەرىن اڭعارتقان وتباسىلار بارشىلىق.ماسەلەن, بيىلدىڭ وزىندە جاڭادان جەتى-سەگىز ءۇي بوي كوتەردى. الدا دا كوتەرىلە بەرەتىنىنە سەنىم مول. ال بۇعان اۋىلداستارىمنىڭ ءومىردىڭ ءمانى دە, ءسانى دە ەڭبەك دەيتىن ۇستانىمدارى دالەل.
ءبىر عانا اتتەگەن-ايى, وسىدان ءبىراز جىل بۇرىن ورتەنىپ كەتكەن كلۋب ءۇيى قايتىپ قالپىنا كەلتىرىلگەن جوق. وسى ماسەلە وڭ شەشىلسە, اۋىل ءومىرى كوڭىلدى بولا تۇسپەك.
جەڭىس سماعۇلوۆ,
اۋىل تۇرعىنى
اقمولا وبلىسى,
ءبىرجان سال اۋدانى,
ساۋلە اۋىلى
...قىنجىلىسىن بىلدىرەدى
ەكپە الماي, ەڭسەمىز كوتەرىلمەيدى
COVID-19-دىڭ ەلىمىزگە دەندەپ ەنگەنىنە دە ءبىر جارىم جىلدان اسىپ بارادى. ءتيىستى جاۋاپتى ورىندار تاراپىنان قابىلدانىپ كەلە جاتقان قاجەتتى شارالارعا قاراماستان, ىندەتتىڭ بەتى قايتار ءتۇرى بايقالمايدى. بۇعان ءبىر جاعىنان ءوزىمىزدىڭ دە كىنامىز بار. ساقتىق شارالارىنا تولىق مويىنسىنا بەرمەيمىز. توي-تومالاق, باسقا دا كوپشىلىك ءىس-شارالار مەن باسقوسۋ, جيىندار ءبىر ءسات تولاستاعان ەمەس. وسىنداي جاۋاپسىز قادامداردىڭ سالدارى دا اۋىر, سوڭى كەيبىر جاعدايلاردا ءولىم-جىتىمگە سوقتىرىپ جاتىر.
مەنىڭشە, بۇل ىندەتكە قارسى تۇرۋدىڭ ەڭ ءبىر ۇتىمدى جولى – ەكپە سالدىرۋ, ءسويتىپ ۇجىمدىق يممۋنيتەت قالىپتاستىرۋ. قازىر نە كوپ, اقپارات كوپ. الەۋمەتتىك جەلىنى اشىپ قالساڭ, ەكپەگە قارسىلىق تانىتقان, بىراق كولدەنەڭ تارتار بىردە-ءبىر ايعاق, دالەلى جوق اقپاراتتان كوزىڭ تۇنادى. ال فەيكتەرگە سەنىپ, ەكپە دەسەڭ ات-توندارىن الا قاشاتىندار قاتارى كوبەيمەسە ازايار ەمەس. ءبىر قىزىعى, وندايلاردىڭ اراسىندا قاراپايىم ازاماتتارمەن قاتار, وقىعان-توقىعانى ءبىر باسىنا جەتەتىندەر كوپ.
بۇدان شىعاتىن قورىتىندى مىناداي: حالىق اراسىندا ءالى دە بولسا ۆاكتسينانىڭ ماڭىزى تۋرالى ناسيحات جۇمىستارى جەتكىلىكسىز. ەكپەنىڭ تيىمدىلىگىن بىلىكتى ماماندار جىلىكتەپ ءتۇسىندىرىپ بەرسە, قول-اياعىن تىرەپ سىرەسىپ تۇرعاندار قاتارى ايتارلىقتاي سەلدىرەيتىنى ءسوزسىز. ايتپەسە كۇنى كەشە وتكەن ۇكىمەت وتىرىسىندا اۋىرىپ جاتقانداردىڭ 99,9 پايىزى ەكپە الماعاندار ەكەنى اتاپ كورسەتىلدى. كىم-كىمگە دە وي سالاتىن جايت.
حامزا تاشاۋوۆ,
«ADM Machineri&Service» جشس
ديرەكتورىنىڭ ساتۋ جونىندەگى ورىنباسارى
نۇر-سۇلتان
...بىرىزدىلىككە شاقىرادى
اتى-ءجونىمىزدى قاشان دۇرىستايمىز؟
ەلىمىز تاۋەلسىزدىگىن جاريالاعالى بەرى 30 جىلعا جۋىق ۋاقىت ءوتتى. بىراق ازاماتتارىمىز ءالى كۇنگە وزدەرىنىڭ اتى-جوندەرىن ءبىر ىزگە ءتۇسىرىپ, قازاقشالاي قويعان جوق. «وۆ» پەن «ەۆ»-كە كەنەشە جابىسقاندار ارامىزدا ءالى تولىپ ءجۇر. قازاقتىعىمىز تولىق قالىپقا تۇسپەي, بۇل ماسەلە جونگە كەلە قويمايتىن سەكىلدى. بۇعان ارامىزدا ورىس ءتىلىنىڭ ىقپالى بۇرىنعىسىنشا كۇشتى بولىپ تۇرعانى دا ءوز كەسىرىن از تيگىزىپ وتىرعان جوق دەسەك, قاتەلەسپەيتىن شىعارمىز.
جالپى, وزگە ۇلتتاردىڭ كىم ەكەنىن اتا-تەگىنىڭ جازىلۋىنان-اق بىردەن اڭعاراسىڭ. ءتىپتى كەڭەستىك كەزەڭدە دە ۇلتتىق قالىپتارىنان اجىراماعان حالىقتار بارشىلىق. سوندىقتان وسى ۇلتىمىز ءۇشىن ماڭىزى ايتارلىقتاي جوعارى ىسكە باسا ءمان بەرەتىن كەزدىڭ كەلگەنى انىق. جانە ءبىر اتاپ ايتار جايت, اتا-تەگىمدى قازاقشالايمىن دەگەندەرگە ءتيىستى ورگاندار تاراپىنان بيۋروكراتيالىق توسقاۋىلداردى مەيلىنشە ازايتۋ كەرەك. ويتكەنى وسى ءبىر قاقپاقىل مەن سوزبۇيدادان قاشىپ, حقو جاققا اتتاپ باسقىسى كەلمەيتىندەر دە از ەمەس ەكەنى انىق.
ەرداحمەت دوستەمەس ۇلى,
ەڭبەك ارداگەرى
جامبىل وبلىسى,
مويىنقۇم اۋدانى,
شىعاناق اۋىلى
...ۇستانىمىن ورتاعا سالادى
بۇل – مەنىڭ جەكە كوزقاراسىم
كەيبىرەۋدىڭ جەكە ۇستانىمى, ومىردەگى قۇبىلىستارعا كوزقاراسى كوپشىلىكتىڭ پىكىرىمەن قابىسپاي جاتۋى ابدەن مۇمكىن. بىراق قازىرگى دەموكراتيا دەپ ايدار تاعىلعان زاماندا كەز كەلگەن ادامنىڭ ءوزىنىڭ بەلگىلى ءبىر ماسەلەگە قاتىستى كوزقاراسى مەن ۇستانىمىن اشىق بىلدىرۋگە تولىق قۇقىعى بار عوي دەپ بىلەمىن.
وسى ورايدا مەنىڭ ايتپاعىم مىنا ءبىر شەتىن ماسەلە جايىندا ەدى. بۇگىندە قىز ۇرلاۋ ۇدەرىسى بۇرىنعى كەزدەردەگىدەي كەڭ ەتەك جايماسا دا كەزدەسىپ قالىپ جاتادى. ال بۇل ماسەلەگە قارسىلار قاتارى دا كۇن وتكەن سايىن قالىڭداي ءتۇسىپ وتىرعانداي. قىز ۇرلاعاندار قاتاڭ جازاعا تارتىلۋى ءتيىس دەيدى وسى كوزقاراستاعىلار. ولاردىڭ ۋاجدەرى دە بەلگىلى: ەكى جاس ءوز ەرىكتەرىمەن ءسۇيىپ قوسىلۋلارى كەرەك.
بۇعان قارسى ءۋاج كەلتىرەتىن بولسام, مەن دە قىز الىپ قاشىپ ۇيلەندىم. قازىر زاڭدى نەكەدەمىز. تەگىن دە وزىمە اۋىستىرىپ الدىم. ءبىز سياقتى وسىنداي جولمەن باقىتىن تاپقاندار دا از ەمەس ەكەنى تاعى ايان. بارلىعى قىزدىڭ اقىل-پاراساتىنا بايلانىستى. ال ۇرلاعان جىگىتكە تۇرمىسقا شىعۋعا ءۇزىلدى-كەسىلدى قارسىلىق تانىتسا, ونداي قىزدى زورلىقپەن ۇستاۋدىڭ دا قاجەتى جوق قوي دەپ ويلايمىن. سوندا «قۇدا دا, قۇداعي دا تىنىش» بولادى, ياعني جىگىت جاعى ءىستى بولۋدان باسىن اراشالاپ قالادى.
كەنجەتاي بايقوجا
قاراعاندى وبلىسى,
تەمىرتاۋ قالاسى