نۇر-سۇلتان اكىمدىگى قالانىڭ ەكولوگياسىن جاقسارتۋ بويىنشا جۇيەلى جۇمىس جۇرگىزۋدە. سونىڭ ىشىندە قالا اۋماعىندا رۇقسات ەتىلمەگەن قوقىس ۇيىندىلەرىن جويۋ جانە بولدىرماۋ بويىنشا جۇمىستار قولعا الىنعان. جىل باسىنان بەرى ەكولوگيالىق پوليتسيامەن بىرلەسىپ 100-دەن استام رۇقسات ەتىلمەگەن قوقىس ورنى جويىلدى. پوليگونعا 70 مىڭ توننادان استام قالدىق شىعارىلدى, دەپ حابارلايدى Egemen.kz.
قوقىستى بەلگىلەنبەگەن ورىندارعا جيناپ قويعانى جانە زاڭسىز تۇسىرگەنى ءۇشىن 1000 قۇقىق بۇزۋشى (قۇرىلىس ۇيىمدارى, كاسىپكەرلەر جانە ت.ب.) اكىمشىلىك جاۋاپكەرشىلىككە تارتىلدى. قۇقىق بۇزۋشىلار iKomek قىزمەتىنىڭ ارقاسىندا جاۋاپقا تارتىلادى. بىرنەشە رەت قايتالانعان جاعدايدا قۇرىلىس جۇمىسى توقتاتىلادى.
جۇيەلى شارالار بويىنشا دا اۋقىمدى جۇمىستار جۇرگىزىلۋدە: بيىل «سولتۇستىك جوتاسى» كارەرىن ودان ءارى رەكۋلتيۆاتسيالاي وتىرىپ, قۇرىلىس قالدىقتارىن جيناۋعا جانە وڭدەۋگە ارنالعان الاڭ جۇمىسى ىسكە قوسىلادى. الاڭدا كىرپىش, اسفالت, بەتون قالدىقتارى جانە ت.ب. سياقتى قۇرىلىس قالدىقتارىن قايتا وڭدەيتىن ۇساتۋ كەشەنىن ورناتۋ قاراستىرىلعان. سونىمەن قاتار, مىسالى, قۇرىلىس قالدىقتارىنىڭ 50%-ىن قيىرشىق تاسقا, 10-15%-ىن ارماتۋراعا جانە ت.ب. وڭدەۋگە بولادى.
سونداي-اق, قوقىس وڭدەۋ زاۋىتىن جاڭعىرتۋ جۇمىستارى جالعاسۋدا. بۇل كاسىپورىن قۋاتىن ەكى ەسەگە – جىلىنا 250 مىڭ توننادان 450 مىڭ تونناعا دەيىن ارتتىرۋعا مۇمكىندىك بەرەدى.
بۇدان باسقا, قاتتى تۇرمىستىق قالدىقتاردى جەكە جيناۋ ءۇشىن قالا بويىنشا ارنايى كونتەينەرلەر, سونداي-اق قۇرامىندا سىنابى بار شامداردى جيناۋعا ارنالعان ارنايى كونتەينەرلەر ورناتىلدى. تقق وڭدەۋ دەڭگەيى 75%, قايتالاما شيكىزاتتى الۋ – 17% كورسەتكىشىنە جەتتى.
ەكولوگيانى جاقسارتۋدا قالانى گازداندىرۋ, جاپپاي كوگالداندىرۋ, جەلىگە ەلەكتر اۆتوبۋستارىن قوسۋ جانە ت.ب. ماڭىزدى ءرول اتقارادى.