وتكەن تاۋلىكتە, 25 شىلدەدە ەلوردانىڭ مونيتورينگتىك توپتارى كارانتين تالاپتارىن بۇزعان 9 كاسىپكەرلىك نىسانىن انىقتادى. قالا مەكەمەلەرىندە كوبىنەسە بەتپەردە رەجيمى, جۇمىس كەستەسى, الەۋمەتتىك اراقاشىقتىق ساقتالمايدى جانە ادامداردىڭ كوپ جينالۋىنا جول بەرىلەدى, دەپ حابارلايدى نۇر-سۇلتان اكىمدىگىنىڭ رەسمي سايتى.
سارىارقا اۋدانىندا وتكەن تاۋلىكتە 7 كاسىپكەرلىك نىسانىندا ءتəرتىپ بۇزۋشىلىقتار تىركەلدى. «استوريا», «استاندىر», «ستامبۋل», «باراشكا» كافەلەرىندە, «و ازامات», «ارمان قالا» مەيرامحانالارىندا, كۋبرين كوشەسىندەگى ويىن كلۋبىندا كارانتين رەجيمى ساقتالمادى.
ەسىل اۋدانىندا بەلگىلەنگەن ۋاقىتتان كەيىن «Ragnarok» كومپيۋتەرلىك كلۋبى جۇمىسىن جالعاستىردى. بايقوڭىر اۋدانىندا ورنالاسقان «Zara» تۇنگى كلۋبى دا وسىنداي ءتəرتىپ بۇزۋشىلىققا جول بەرگەن.
كارانتين تالاپتارىن بۇزعاندارعا قاتىستى جينالعان ماتەريالدار ءتيىستى شارالار قابىلداۋ ءۇشىن اۋداندىق سانيتارلىق-ەپيدەميولوگيالىق باقىلاۋ باسقارماسىنا تاپسىرىلدى.
ايتا كەتەيىك, وتكەن ەكى كۇندە, 23 جانە 24 شىلدەدە قالادا كارانتين شەكتەۋلەرىن بۇزعانى ءۇشىن 67 كاسىپكەرلىك نىسانى اكىمشىلىك جاۋاپكەرشىلىككە تارتىلدى.
كۇن سايىن مونيتورينگ توپتارى قالانىڭ 100-دەن استام كاسىپكەرلىك نىسانىندا سانيتارلىق نورمالار مەن شەكتەۋ شارالارىنىڭ ساقتالۋىن تەكسەرەدى. كەيبىر ەلوردالىق مەكەمەلەر جاۋاپكەرشىلىككە تارتىلاتىنىنا قاراماستان, سانيتارلىق نورمالار مەن كارانتين تالاپتارىن ەسكەرمەيدى.
ەستەرىڭىزگە سالا كەتەيىك, نۇر-سۇلتانداعى ەپيدەميولوگيالىق احۋال تۇراقسىز بولىپ قالۋدا. كۇن سايىن قالادا كوروناۆيرۋستىڭ 1300 جاعدايى انىقتالادى. ەلوردا تۇرعىندارى مەن قوناقتارى, سونداي-اق كاسىپكەرلىك نىساندارى سانيتارلىق نورمالاردى جانە كارانتين رەجيمىنىڭ تالاپتارىن قاتاڭ ساقتاۋى ءتيىس. سول سياقتى بەتپەردە تاعۋ, ادام كوپ جينالاتىن جەرلەرگە بارۋدان اۋلاق بولۋ جانە ت.ب. ۇسىنىلادى.
بۇل رەتتە قاۋىپتى ۆيرۋسپەن كۇرەسۋ ءۇشىن ءبىر عانا كارانتين تالاپتارىن ساقتاۋ جەتكىلىكسىز, حالىقتى جاپپاي ۆاكتسيناتسيالاۋ ارقىلى ۇجىمدىق يممۋنيتەتتى قالىپتاستىرۋ قاجەت.