بۇعان دەيىن «كولساي كولدەرى» ۇلتتىق پاركىندە فوتوتۇزاق قار بارىسىن تىركەگەنىن حابارلاعانبىز. ەندى تاعى ءبىر جاقسى جاڭالىق قىزىل كىتاپقا ەنگەن ەرەكشە جىرتقىش فوتوتۇزاققا تاعى ءبىر مارتە ىلىكتى. بۇل جولى تۇتاس ءبىر وتباسى - انالىق بارىس جانە ونىڭ الدىڭعى جىلى تۋىلعان ەكى كۇشىكتەرى بايقالدى, دەپ حابارلايدى Egemen.kz ەكولوگيا مينيسترلىگىنە سىلتەمە جاساپ.
بۇنىڭ الدىندا فوتوتۇزاققا تۇسكەن بارىس اتالىق ەدى. قازىرگى ۋاقىتتا پارك اۋماعىندا بۇۇدب-نىڭ قار بارىسىن ساقتاۋ جونىندەگى جوباسى ىسكە اسىرىلۋدا. ونىڭ شەڭبەرىندە ماماندار ۇلتتىق پارك اۋماعىنا بىرنەشە فوتوتۇزاق ورناتتى.
عالىمداردىڭ ايتۋىنشا بارىستىڭ بۇل اۋماقتا پايدا بولۋىنا 2017 جىلدان باستاپ وسى پاركتە قار بارىسىنىڭ نەگىزگى قورەگى – ءسىبىر تاۋ ەشكىسىنە اۋەسقويلىق جانە تروفەيلىك اڭشىلىققا شەكتەۋ قويىلعاندىعى سەبەپ.
ۇلتتىق پاركتە قار بارىسىنان وزگە دە قىزىل كىتاپقا ەنگەن جانۋارلاردى ساقتاۋ ءۇشىن ماماندار ۇلتتىق پاركتىڭ كۇزەت ايماعىنا, سونداي-اق جوعارعى كوكسۋ قاۋمالى مەن ورىقتى, تۇلكىلى, قوياندىتاۋ, توقسانباي, اتىجوق, دۋلانتاۋ, ورتاتاۋ تاۋلارىنا تەزدەتىپ ەكولوگيالىق ءدالىز قۇرۋدى ۇسىنادى. بۇل «التىن – ەمەل» تاۋ سىلەمىندەگى قار بارىسى پوپۋلياتسياسىنىڭ كەدەرگىسىز كوشۋىنە جانە ساقتالۋىنا عانا ەمەس, سونداي-اق ۇلتتىق پاركتە ارقار, تۇركىستان سىلەۋسىنى, سابانشى, تيان-شان قوڭىر ايۋى, تاس سۋسارى سياقتى سيرەك كەزدەسەتىن جانە جويىلىپ بارا جاتقان جانۋارلاردىڭ كوبەيۋىنە ىقپال ەتەتىن بولادى