ەل تاۋەلسىزدىگىنىڭ 30 جىلدىعىن مەرەكەلەۋ اياسىندا «قايىرىمدى ىستەر مارافونى» جالپىۇلتتىق جوباسى جۇزەگە اسىپ جاتىر. بيىل «قايىرىمدى ىستەر مارافونى» اياسىندا رەسپۋبليكالىق جانە قالالىق دەڭگەيدە بارلىعى 953 ءىس-شارا جوسپارلانىپ وتىرسا, ونىڭ ەكەۋى رەسپۋبليكالىق, 436-ى قالالىق, 549-ى اۋداندىق دەڭگەيدە وتەدى.
الماتى قالاسىندا وتەتىن ءىس-شارالار ءار ايداعى اتاۋلى كۇندەر مەن مەرەكەلەرگە ارنالادى. وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا الماتى قالاسى قوعامدىق دامۋ باسقارماسى باسشىسىنىڭ ورىنباسارى رەنات بەكبەرگەنوۆ جىل باسىنان بەرى جۇزەگە اسقان جانە الدا جوسپارلانىپ وتىرعان ءىس-شارالار بارىسىنا توقتالدى. مىسالى, ماۋسىم ايىندا الماتىدا مەملەكەتتىك رامىزدەر كۇنىنە, مەديتسينا قىزمەتكەرلەرى كۇنىنە جانە پوليتسيا كۇنىنە ارنالعان 70-تەن اسا ءتۇرلى شارا وتكەن. سول ءىس-شارالار بارىسىندا تۇرعىن ءۇي تەرەزەلەرىنە جالاۋلار قويىلىپ, ءانۇران ءبىر مەزگىلدە ورىندالعان. ادامدار كوپ جينالاتىن اۋماقتاردا مەملەكەتتىك تۋ تاراتىلىپ, اۆتوكولىكتەر مەن موتوجارىستار وتسە, شىلدە ايىندا استانا كۇنىنە ارنالعان ونلاين جانە وفلاين فورماتتاعى ءىس-شارالار كوپشىلىكتى ءتانتى ەتتى.
سونداي-اق ر.بەكبەرگەنوۆ قالادا جۇزەگە اسقان ماڭىزدى وقيعالار قاتارىندا 25 ونەركاسىپتىك جانە الەۋمەتتىك-مادەني نىسان پايدالانۋعا بەرىلگەنىن, ونىڭ ىشىندە قازاقستان-شۆەيتساريا تۋريزم جانە قوناقۇي بيزنەسى ينستيتۋتى, Ads Industries فارمزاۋىتى, «تەررەنكۋر» جاياۋ جۇرگىنشىلەر ايماعى, جاڭا بالاباقشا مەن مەكتەپتەر اشىلعانىن اتاپ ءوتتى. ونىڭ ايتۋىنشا, ەكىنشى جارتىجىلدىقتا قالا اكىمدىگى «قايىرىمدى ىستەر مارافونى» اياسىندا 800-دەن اسا ءىس-شارا وتكىزۋدى جوسپارلاپ وتىر. تامىز ايىنىڭ سوڭى مەن قىركۇيەك ايىنىڭ باسىندا ۇستازداردىڭ تامىز كونفەرەنتسياسى مەن كونستيتۋتسيا كۇنىنە ارنالعان اۋقىمدى ءىس-شارالاردى وتكىزۋ جوسپارلانعان. سونداي-اق الماتىدا «تاۋەلسىزدىك جەتىستىكتەرى» تاقىرىبىندا بىرىڭعاي قالالىق سىنىپ ساعاتى مەن اشىق ساباقتار ءوتىپ, اعارتۋشى-عالىم ىبىراي التىنسارينگە ارنالعان ەسكەرتكىش پەن 13 جاڭا ءبىلىم بەرۋ نىسانىن اشۋ جوسپارلانۋدا.
جىل سوڭىنا دەيىن قالا تۇرعىندارىن كوپتەگەن قىزىقتى وقيعا كۇتىپ تۇر. مىسالى, قاراشا ايىندا يندۋستريالىق-يننوۆاتسيالىق جانە الەۋمەتتىك نىسانداردى ىسكە قوسۋ, «الماتى – تاۋەلسىزدىكتىڭ التىن بەسىگى» رەسپۋبليكالىق فورۋمى جانە Creative jastar يننوۆاتسيالىق جوبالار بايقاۋى سياقتى ءىس-شارالار وتەدى. جەلتوقسان ايىندا قالادا تۇڭعىش پرەزيدەنت كۇنىنە ارنالعان شارالارمەن قاتار «تاۋەلسىزدىك شەجىرەسى» تاقىرىپتىق كورمەلەرى, عىلىمي-پراكتيكالىق كونفەرەنتسيالار جوسپارلانعان. جەلتوقسان وقيعاسىنىڭ 35 جىلدىعىنا ارنالعان اتاۋلى كۇنگە ەرەكشە نازار اۋدارىلىپ, اتاۋلى كۇن قارساڭىندا قايىرىمدىلىق ءىس-شارالارى وتكىزىلىپ, مۇقتاج جاندارعا قاجەتتى قولداۋ شارالارى كورسەتىلەدى.
«قايىرىمدى ىستەر مارافونى» رەسپۋبليكالىق جوباسى اياسىندا 396 ءارتۇرلى فورماتتاعى ءىس-شارا جۇزەگە اسادى. جوبانىڭ ارقاسىندا مۇقتاج وتباسىلارعا ازىق-ت ۇلىك جيىنتىعى تۇرىندە ماتەريالدىق قولداۋ كورسەتىلىپ, تۇرعىن ءۇيدى جوندەۋگە مۇمكىندىك بەرىلەدى. بۇگىنگە دەيىن 22 مىڭعا جۋىق الماتىلىققا قولداۋ كورسەتىلگەن. الماتى كاسىپكەرلەرى دە «قايىرىمدى ىستەر مارافونىنا» بەلسەنە قاتىسۋدا. وسى جايىندا ايتىپ وتكەن الماتى قالاسى «قازاقستان ۇيعىرلارىنىڭ رەسپۋبليكالىق مادەني ورتالىعى» قوعامدىق بىرلەستىگى وكىلدىگى توراعاسىنىڭ ورىنباسارى دولكۋنتاي ءابدۋحاليلدىڭ مالىمەتى بويىنشا Metal Prom Group كومپانيالار توبى وتكەن جىلى قايىرىمدىلىققا 105 ملن تەڭگە جۇمساپ, جالپى العاندا, سوڭعى ءۇش جىلدا مۇقتاج جاندارعا 450 ملن تەڭگە كولەمىندە قايىرىمدىلىق كومەك كورسەتكەن. قالاداعى بارلىق كاسىپكەر ءۇشىن قايىرىمدىلىق شاراسى – الەۋمەتتىك جاۋاپكەرشىلىكتىڭ باستى كورىنىسى.
«ەگەمەن-اقپارات»