بۇل سۇراققا وكق-دە وتكەن ءباسپاسوز ءماسليحاتىندا قر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا جاۋاپ بەردى, دەپ حابارلايدى Egemen.kz.
«بۇگىنگى كۇننىڭ دەرەكتەرى بويىنشا الەمدە 189 ملن جاعداي تىركەلدى. ايتا كەتۋ كەرەك, سوڭعى اپتا ىشىندە الەم بويىنشا كوروناۆيرۋس ىندەتىنە شالدىققاندار سانى 2 ەسەگە ارتىپ وتىر. دەرتتىڭ ۇدەيە ءتۇسۋى دەلتا-شتامىمەن دە بايلانىستى, بۇگىندە اتالعان ينفەكتسيا ءتۇرى 100-دەن استام ەلدە تىركەلدى. قازاقستان 26 ماۋسىمنان باستاپ «قىزىل ايماقتا» تۇر. ەلىمىزدىڭ 13 ءوڭىرى ىندەت قاۋپى ءتونىپ تۇرعان ايماقتار قاتارىندا. قازاقستاندا كوۆيد ىندەتىنىڭ تارالۋى ءوسىپ وتىر», دەدى ايجان ەسماعامبەتوۆا.
كوميتەت باسشىسى بۇگىندە ەلىمىزدىڭ بارلىق اۋماعىندا كارانتيندىك شەكتەۋلەردىڭ قاتاڭداتىلىپ جاتقانىن ايتتى.
«ەڭبەك كودەكسىنە سايكەس جۇمىس بەرۋشى ۆاكتسينا الماعان قىزمەتكەردى جۇمىستان بوساتۋعا قۇقىعى بار. ماقسات – جۇمىستان قۋ ەمەس, كەرىسىنشە ۇجىمداعى باسقا دا ازاماتتاردىڭ دەنساۋلىعىن ساقتاپ, قاۋىپسىزدىكتى قامتاماسىز ەتۋ. قىزمەتكەر جۇمىستان ۋاقىتشا بوساتىلادى, ياعني ۆاكتسينا العان جاعدايدا ول ءوز جۇمىسىن قايتا جالعاستىرا الادى. سونداي-اق ۆاكتسينا الماعان جاعدايدا قىزمەتكەر اپتاسىنا ءبىر رەت پتر تەست تاپسىرسا دا بولادى», دەپ ءتۇسىندىردى كوميتەت توراعاسى.