قۇرلىقتىق حوككەي ليگاسىندا (قحل) ونەر كورسەتىپ جۇرگەن نۇر-سۇلتاننىڭ «بارىس» كلۋبى 2021-2022 جىلدارداعى ماۋسىمعا قامدانا باستادى, دەپ جازادى Egemen.kz.
كۇنى كەشە «بارىستىڭ» باس باپكەرى يۋري ءميحايليستىڭ ءوز ورنىندا قالعانى جايىندا رەسمي اقپارات تارادى. قاراعاندىنىڭ تۋماسى 2020 جىلدىڭ جازىندا ەلوردالىق كلۋبتىڭ تىزگىنىن ۇستاعانى ءمالىم. ايتۋلى ماماننىڭ جەتەكشىلىگىمەن «بارىس» كحل-دىڭ پلەي-وفف دوداسىنا شىعىپ, گاگارين كۋبوگى ءۇشىن تالاسۋ مۇمكىندىگىنە يە بولدى.
سونىمەن قوسا ميحايليس قازاقستاننىڭ ۇلتتىق قۇراماسىنا دا جەتەكىشىك ەتتى. بيىل لاتۆيادا ۇيىمداستىرىلعان الەم چەمپيوناتىندا جەرلەستەرىمىز جەتى ويىننىڭ تورتەۋىن ءوز پايداسىنا شەشىپ, ءوز توبىندا بەسىنشى ورىنعا تابان تىرەدى. بۇل جارىس بارىسىندا ءبىزدىڭ جىگىتتەر لاتۆيا, فينليانديا, گەرمانيا جانە يتاليا قۇرمالارىن ۇتتى. ءسويتىپ, قازاقستاننىڭ حوككەيشىلەرى الەم چەمپيوناتىنىڭ قورىتىندىسى بويىنشا ءوز تاريحىندا تۇڭعىش رەت ۇزدىك وندىقتىڭ قاتارىنا قوسىلدى.
«بارىس» حوككەي كلۋبى مەن يۋري ميحايليس اراسىنداعى كەلسىمشارت 2022 جىلدىڭ 30 ساۋىرىنە دەيىن جاسالدى. سونداي-اق باپكەرلەر شتابىندا دا وزگەرىس جوق. الەكساندر احتسيگەر, اندرەي شايانوۆ, ماكسيم سەميونوۆ جانە الەكساندر شيمين باس باپكەردىڭ كومەكشىلەرى بولىپ بەكىتىلدى.