ىشكى ىستەر ورگانىنىڭ قىزمەتكەرلەرى ەلوردادا جالعان ۆاكتسينا قۇجاتىن ساتىپ جۇرگەن مەديتسينالىق ورتالىق ديرەكتورىن ۇستادى, دەپ حابارلايدى Egemen.kz.
نۇر-سۇلتاندا پتر تەستىلەۋدەن وتكەنى تۋرالى جالعان انىقتاما ساتىپ جۇرگەن تۇلعالار انىقتالۋدا. شىلدەنىڭ باسىنان بەرى قولدان جاسالعان انىقتاما ساتۋدىڭ 2 جاعدايى تىركەلدى.
«استانا ساقشىلارى مەديتسينالىق ورتالىق ديرەكتورىن ۇستادى. ول اۋرۋ جۇقتىرماعانى تۋرالى جالعان پتر تەستىلەۋ انىقتاماسىن بەرۋمەن اينالىستى دەگەن كۇدىككە ءىلىنىپ وتىر. ورتالىق باسشىسىنىڭ زاڭسىز انىقتاما ءۇشىن كليەنتتەردەن 6 مىڭ تەڭگەدەن العانى انىقتالدى. قازىرگى تاڭدا پوليتسيا پتر-تەستىلەۋدەن وتكەنى تۋرالى انىقتامانى زاڭسىز العان تۇلعالاردىڭ سانىن انىقتاپ جاتىر», دەدى ىشكى ىستەر مينيسترلىگىنىڭ ءباسپاسوز وكىلى شۇعىلا تۇرلىبەك.
ونىڭ ايتۋى بويىنشا, ەلىمىزدە وسى كۇنى پتر-تەست قۇجاتتارىن شەتەلدە وتىرىپ-اق ساتاتىن ادامدار پايدا بولعان.
«پوليتسيا قىزمەتكەرلەرى ەلدەن تىس اۋماقتا بولا تۇرىپ, ۆيرۋس جۇقتىرماعانى تۋرالى پتر-تەست انىقتاماسىنىڭ ەلەكتروندى نۇسقاسىن جاساپ, 5500 تەڭگەگە ساتقان قازاقستاندىقتى انىقتادى. انىقتامالاردى «تەلەگرام» مەسسەندجەرى ارقىلى جىبەرىپ وتىرعان. اتالعان وقيعا بويىنشا قۇجات دايىنداپ ساتقانى ءۇشىن قىلمىستىق ءىس قوزعالدى. پوليتسيا وكىلدەرى مەديتسينا ورتالىقتارىن, ەمحانالار مەن پتر-تەست بەكەتتەرىن استانا تۇرعىندارىنا جالعان قۇجات بەرۋ فاكتىسىنە تەكسەرىپ جاتىر», دەدى ىشكى ىستەر مينيسترلىگىنىڭ ءباسپاسوز وكىلى.