ءماجىلىس دەپۋتاتتارى ايماقتاردى ارالاۋعا شىقتى. ولار ءوڭىر حالقى الدىندا سايلاۋالدى باعدارلامالاردىڭ ىسكە اسىرىلۋىن تالدايدى, قابىلدانعان زاڭنامالىق جاڭاشىلدىقتاردى تانىستىرادى, سونداي-اق ايماققا قاتىستى وزەكتى ماسەلەلەردىڭ شەشىلۋىن باقىلاۋعا الادى, دەپ حابارلايدى Egemen.kz.
ءبىرىنشى پارلامەنتتىك سەسسيانىڭ سوڭىندا ءماجىلىس توراعاسى نۇرلان نىعماتۋلين دەپۋتاتتىق كورپۋستىڭ نازارىن ايماقتارداعى جۇمىستىڭ ماڭىزدىلىعىنا اۋداردى.
ءماجىلىس دەپۋتاتتارى سايلاۋالدى باعدارلامالاردىڭ مىندەتتەرى جەرگىلىكتى جەرلەردە قالاي جۇزەگە اسىرىلىپ جاتقانىن, وڭىرلەردىڭ وندىرىستىك جانە اۋىلشارۋاشىلىق الەۋەتىن ارتتىرۋ ءۇشىن قانداي شارالار قابىلدانىپ جاتقانىن, حالىقتىڭ الەۋمەتتىك ماسەلەلەرى قالاي شەشىلىپ جاتقانىن تالداۋعا نيەتتى. ول ءۇشىن Nur Otan, «اق جول», قازاقستان حالىقتىق پارتياسى پارلامەنتتىك فراكتسيالارىنىڭ دەپۋتاتتارى, سونداي-اق قحا دەپۋتاتتىق توبى وندىرىستىك نىسانداردى, دەنساۋلىق ساقتاۋ, ءبىلىم بەرۋ مەكەمەلەرىن, شارۋا قوجالىقتاردى ارالاپ, ماسەلەلەردى تالقىلايدى, ءار ايماققا قاتىستى, تەك وبلىس ورتالىقتارىندا عانا ەمەس, شالعاي ەلدى مەكەندەردە دە ازاماتتاردى قابىلداۋ وتكىزەدى.
سونىمەن قاتار دەپۋتاتتار قابىلدانعان زاڭنامالىق جاڭاشىلدىقتار تۋرالى ايتادى.
دەپۋتاتتار بارلىق قويىلعان سۇراقتاردى, ۇسىنىستاردى جانە پروبلەمالاردى جالپىلاپ, ناقتى ءىس-شارالار قابىلداۋ ءۇشىن ۇكىمەتكە جىبەرۋگە, سونداي-اق ولاردى الداعى زاڭ شىعارۋ جۇمىستارىندا ەسكەرۋگە نيەتتى.
دەپۋتاتتاردىڭ ايماقتارمەن جۇمىسى ەپيدەميولوگيالىق جاعداي مەن سانيتارلىق تالاپتاردى ەسكەرە وتىرىپ ۇيىمداستىرىلاتىن بولادى.