ەلباسى رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ توراعاسى ۆالەنتينا ماتۆيەنكومەن تەلەفون ارقىلى سويلەستى, دەپ حابارلايدى Egemen.kz.
ۆالەنتينا ماتۆيەنكو نۇرسۇلتان نازارباەۆتى تۋعان كۇنىمەن جانە ەلوردا كۇنىمەن قۇتتىقتاپ, زور دەنساۋلىق پەن جاڭا بەلەستەردى باعىندىرا بەرۋىنە تىلەكتەستىك ءبىلدىردى.
فەدەراتسيا كەڭەسىنىڭ توراعاسى جاۋاپتى شەشىمدەر قابىلداپ, كورەگەن ساياسات ۇستانا بىلگەن نۇرسۇلتان نازارباەۆ كەڭ اۋقىمدى رەفورمالاردىڭ ىرگەتاسىن قالاعانىن, ءوز ەلىنىڭ جۇيەلى دامۋى مەن حالىقتىڭ ءال-اۋقاتىن ارتتىرۋدى قامتاماسىز ەتكەنىن, سونداي-اق قازاقستاننىڭ حالىقارالىق بەدەلىن ارتتىرۋعا ىقپال ەتكەنىن اتاپ ءوتتى.
ەلباسى ۆالەنتينا ماتۆيەنكوعا جىلى لەبىزدەرى ءۇشىن ريزاشىلىعىن ءبىلدىرىپ, قازاقستان مەن رەسەيدىڭ ستراتەگيالىق ىنتىماقتاستىق پەن وداقتاستىق قاتىناسى اياسىندا ەكى ەل اراسىندا پارلامەنتارالىق بايلانىستاردى ودان ءارى نىعايتۋدىڭ ماڭىزىن ايتتى.