ەلباسى رەسەي فەدەراتسياسىنىڭ پرەزيدەنتى ۆلاديمير پۋتينمەن تەلەفون ارقىلى سويلەستى, دەپ حابارلايدى Egemen.kz.
رەسەي پرەزيدەنتى نۇرسۇلتان نازارباەۆتى شىن جۇرەكتەن تۋعان كۇنىمەن قۇتتىقتاپ, مىقتى دەنساۋلىق, باقىت جانە كوپجوسپارلى مەملەكەتتىك قىزمەتىنە جاڭا جەتىستىكتەر تىلەدى. ۆلاديمير پۋتين قازاقستاننىڭ قول جەتكىزگەن تولاعاي تابىستارى نۇرسۇلتان نازارباەۆتىڭ ەسىمىمەن تىعىز بايلانىستى ەكەنىن اتاپ ءوتتى.
رەسەي باسشىسى قازاقستان رەسپۋبليكاسىنىڭ تۇڭعىش پرەزيدەنتى قازاقستان مەن رەسەي باۋىرلاس حالىقتارىنىڭ يگىلىگى ءۇشىن ستراتەگيالىق ىنتىماقتاستىق پەن وداقتاستىقتى نىعايتۋعا, سونداي-اق ەۋرازيا ەكونوميكالىق وداعى اياسىنداعى ينتەگراتسيالىق پروتسەستەردى تەرەڭدەتۋگە جانە كەڭەيتۋگە زور ۇلەس قوسۋدى جالعاستىرىپ كەلە جاتقانىن ايتتى.
ەلباسى ۆلاديمير پۋتينگە جىلى لەبىزدەرى ءۇشىن ريزاشىلىعىن ءبىلدىرىپ, تاتۋ كورشىلىك جانە ءوزارا سەنىمگە نەگىزدەلگەن قازاقستان مەن رەسەي ىنتىماقتاستىعى حالىقارالىق قاتىناستاردىڭ جارقىن ۇلگىسى ەكەنىنە نازار اۋداردى.