ۇلتتىق قاۋىپسىزدىك كوميتەتىنىڭ قىزمەتكەرلەرى حالىقارالىق ەسىرتكى ارناسىن جويدى, دەپ حابارلايدى Egemen.kz.
ۇقك ءباسپاسوز قىزمەتىنىڭ مالىمدەۋىنشە, ەسىرتكى قازاقستانعا اۋعانستاننان جەتكىزىلىپ وتىرعان.
– ۇلتتىق قاۋىپسىزدىك كوميتەتى پروكۋراتۋرا ورگاندارىنىڭ كەلىسىمى اياسىندا جەدەل-ىزدەستىرۋ شارالارىن جۇرگىزىپ, اۋعانستاننان قازاقستانعا اپيىن ەسىرتكىسىن كونتراباندالىق جولمەن تۇراقتى جەتكىزىپ تۇرعان ترانسۇلتتىق ەسىرتكى قۇرىلىمىن انىقتاپ, جولىن كەستى, - دەلىنگەن حابارلامادا.
الماتىدا 15 ماۋسىمدا جۇرگىزىلگەن حالىقارالىق ارنايى وپەراتسيا كەزىندە ەسىرتكى ترافيگىن ۇيىمداستىرعان ازامات 25 كەلى ەسىرتكى تاسىمالداعان جەرىنەن ۇستالدى. انىقتالعانداي, كۇدىكتى رەسەيدە وسىعان ۇقساس قىلمىسى ءۇشىن ىزدەۋدە بولعان.
– بۇل ادام قىلمىستىق جاۋاپكەرشىلىكتەن جالتارۋ ءۇشىن تاجىكستان رەسپۋبليكاسى ازاماتىنىڭ جالعان تولقۇجاتىن پايدالانعان. سونىمەن قاتار ونىڭ سىبايلاسى – قازاقستان ازاماتى ۇستالدى, - دەدى ۆەدومستۆوداعىلار.
تەرگەۋ ماتەريالدارى قىلمىستىق كودەكستىڭ 286-بابى 4-تارماعى جانە 297-بابى 3-تارماعى بويىنشا سوتقا دەيىنگى تەرگەۋلەردىڭ بىرىڭعاي رەەسترىنە تىركەلدى.
ەسىرتكى اكتسياسىنا قاتىسى بار وزگە دە ادامداردى انىقتاۋ بويىنشا جەدەل تەرگەۋ شارالارى جالعاسۋدا.