سپورت جۋرناليستيكاسى دەسە, ەسىمى سەيداحمەت بەردىقۇلوۆتان كەيىن العاشقىلاردىڭ ءبىرى بولىپ اتالاتىن اتپال اعامىز ءدۇرالى دۇيسەباي دا بيىل كەلمەستىڭ كەمەسىنە ءمىنىپ كەتە باردى. قازاقستاننىڭ مادەنيەت قايراتكەرى, قازاقستان جۋرناليستەر وداعى جانە سەيداحمەت بەردىقۇلوۆ سىيلىقتارىنىڭ يەگەرى اتانعان ول سانالى عۇمىرىن قازاق سپورتىنىڭ جىلناماسىن زەردەلەۋگە, جۋرناليستيكا سالاسىندا ەڭ كەنجەلەپ قالعان سپورت جۋرناليستيكاسىن ودان ءارى دامىتۋعا ۇزدىكسىز قىزمەت جاساعان جان ەدى.
ءبىرى بىلسە, ءبىرى بىلمەس, ءدۇرالى دۇيسەباي سپورت جۋرناليستيكاسىنا كەلگەنگە دەيىن, سپورتى دامىعان س.برەۋسوۆ اتىنداعى مەكتەپتى 1971 جىلى ۇزدىك ءتامامداپ, كەيىننەن قازمۇۋ-دىڭ جۋرناليستيكا فاكۋلتەتىنە وقۋعا تۇسەدى. جۋرناليستيكاعا دەيىن سپورتتىڭ ىشكى «كۋحنياسىن» ءبىر كىسىدەي مەڭگەرگەن د.دۇيسەباي كەيىننەن سپورت جۋرناليستيكاسىنا دەن قويدى. 1981 جىلى وقۋىن بىتىرە سالىپ, اتاقتى «لەنينشىل جاس» گازەتىنە جۇمىسقا ورنالاسىپ, سەيداحمەت بەردىقۇلوۆتاي بىلگىر باس رەداكتوردىڭ قامقورلىعىن كوردى. وندا ون التى جىل تابان اۋدارماي جۇمىس ىستەپ, 1996 جىلى مەملەكەتتىك تەرگەۋ كوميتەتىنىڭ جاڭادان اشىلعان «قىلمىس پەن جازا» – «پرەستۋپلەنيە ي ناكازانيە» گازەتىنە باس رەداكتور بولدى. كەيىننەن اسكەري قىزمەتتە بولىپ, زەينەتكە شىققان سوڭ «حالىق ءسوزى», «Sport» – «سپورت» گازەتتەرىندە قىزمەت ەتتى. ءومىرىنىڭ سوڭعى جىلدارىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وقىتۋشى بولىپ, شاكىرت تاربيەلەۋمەن اينالىستى.سوڭىنان ەرگەن شاكىرتتەرىنە, سپورت جۋرناليستيكاسىنداعى وزىنەن كەيىنگى ءىنى-قارىنداستارىنا جاس دەپ قاراماي, ولارمەن ۇنەمى ساناسىپ, اقىلداسىپ وتىراتىن. شاكىرتتەرىنىڭ قاتەلىگىن ەشقاشان بەتىنە باسىپ, كوپ الدىندا الالامايتىن. ارنايى سپورتتىق ءىس-شارالاردا, ءباسپاسوز جيىندارىندا كەزدەسە قالعاندا عانا جاناشىرلىقپەن اعالىق اقىلىن ايتىپ, قولداۋ بىلدىرەتىن. تەك اقىلىن ايتىپ قانا قويماي, «بۇل تۋرالى ءوزىڭ قالاي ويلايسىڭ», دەپ وزگەنىڭ ويىمەن دە ساناسۋدى ار كورمەيتىن. اڭقىلداعان, اقكوڭىل ءدۇر-اعامىز بارىنە بىردەي اكەدەي قامقور بولىپ, «اينالايىن!» دەپ-اق اينالاسىنا شۋاق شاشىپ جۇرەتىن وسىنداي جان ەدى...