قالامدى – قارۋ, ءسوزدى – سەرت دەپ ۇعاتىن جۋرناليستەر قازىر سيرەك. بۇقارالىق اقپارات قۇرالىن ءتورتىنشى بيلىك دەسەك, سول ۇلكەن بەدەلدىڭ قۇنىن قۇلاتپاي ءجۇرۋ ءۇشىن دە تەرەڭ پاراسات-پايىم, جازۋعا دەگەن اسا زور ماحاببات پەن ىجداھات كەرەك.
ارينە, مۇنداي مەجەدەن جۋرناليستيكانىڭ كەشەگى كلاسسيكالىق مەكتەبىنەن وتكەن, جازۋ-سىزۋدىڭ مەحناتىن ازاپ دەپ ەمەس, ونەر دارەجەسىندە باعالايتىن ورەلى جاندار عانا كورىنەدى. سانالى عۇمىرىنىڭ بارىن سارعايعان گازەت بەتتەرىنە سارپ ەتكەن سونداي تۇلعانىڭ ءبىرى – قازاقستاننىڭ ەڭبەك سىڭىرگەن قايراتكەرى, قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىعىنىڭ لاۋرەاتى, قازاقستان جۋرناليستەر وداعى سىيلىعىنىڭ لاۋرەاتى ماعاۋيا سەمباي ەدى. وبلىستىق «Ortalyq Qazaqstan» گازەتىن شيرەك عاسىرعا جۋىق باسقارعان بىلىكتى باسشى, تالاپشىل رەداكتور, باس باسىلىم «Egemen Qazaqstan» گازەتىندە دە جەمىستى قىزمەت ەتكەن پۋبليتسيست ماعاۋيا سلامبەك ۇلىنىڭ جالپى قازاق ءباسپاسوزىنىڭ كوشىن العا ۇزاتۋدا ەڭبەگى ەرەن دەسەك قاتەلەسپەگەن بولار ەدىك.كەشەگى قازاق جۋرناليستيكاسىنىڭ كوريفەيى, نامىستىڭ ناركەسكەنى اتانعان نۇرماحان ورازبەكوۆتىڭ الدىن كورگەن, ءتالىمىن العان جۋرناليست-قالامگەر ماعاۋيا ءوزى دە كەيىن اعالار سالعان سارا جولدى دارا داڭعىلعا اينالدىرا ءبىلدى. كەڭەس وداعىنىڭ قىلىشىنان قان تامىپ تۇرعان قيىن-قىستاۋ كەزدىڭ وزىندە «تامىز ب ۇلىگىن» تايساقتاماي ءبىرىنشى باسقان «Ortalyq Qazaqstan» گازەتىنىڭ بەدەلى ەل ىشىندە ارقاشان بيىك. «ەگەمەننەن» كەيىنگى ەكىنشى گازەت» دەگەن بەيرەسمي اتاعى بار اقيقاتتىڭ الداسپانى ماعاۋيا سەمباي باسقارعان تۇستا دا تۇعىرىنان تومەندەمەدى. ءباسپاسوز باھادۇرلەرىن باپتاۋدا ونىڭ ەرەكشە ۇستازدىعى ءوز الدىنا جەكە تاعىلىم. جالپى, ونىڭ رەداكتورلىعى تەك مانساپ ماڭايىندا عانا ەمەس, مىنەز مىنبەرىندە دە كورىنىپ تۇراتىن. بيىل اتالعان وبلىستىق گازەتتىڭ تورقالى توقسان جىلدىق تويى. شىركىن, ماعاۋيا سەمباي بۇل قىزىقتى كورە الاي ومىردەن وزدى... ارينە, وكىنىشتى, بىراق سوڭىندا شاكىرتتەرى بار ۇستازدىڭ «اتى دا, حاتى دا» ەشقاشان ولمەك ەمەس.