ءومىرىمنىڭ ەڭ ءبىر شۋاقتى دا قۋاتتى جىلدارىن جۋرناليستيكاعا ارناعان اداممىن. وسىناۋ قاسيەتتى ماماندىقتىڭ كيەسىن كەتىرمەۋ, تۇنىعىن لايلاماۋ ازاماتتىق ۇستانىمىما اينالدى. قالام قارىمىمىز, جاستىق جالىنىمىز ءباسپاسوز ايدىنىندا ءوتتى. قوعام ايناسىن ايشىقتاپ, كۇندەلىكتى ءومىر تىنىسىن گازەت ارقىلى حالىققا جەتكىزىپ وتىردىق. قولىنا قالام ۇستاعان ءىنى قارىنداستارىمدى, بالالارىمدى كاسىبي مەرەكەسىمەن قۇتتىقتاعىم كەلەدى.
«قازاق ءباسپاسوزىنىڭ قارا شاڭىراعى, باس باسىلىم, تورە گازەت, توبە گازەت, ەل گازەتى» دەيمىز, قالاي ايتساق تا, ءتولباسى بولعان «Egemen Qazaqstan» – باسپاسوزدەگى العاشقى ينستيتۋتىمىز. سوناۋ الاش ارىستارى دۇنيەگە اكەلگەن «قازاق» گازەتىنىڭ زاڭدى مۇراگەرى بولعان بۇل باسىلىم شىن مانىندەگى جاڭا ادەبيەتىمىزدى وركەندەتۋدى, تۋعان ءتىلىمىزدى بايىتۋدى, مادەنيەتىمىزدى ماۋەلەندىرۋدى سالا-سالاسىمەن جۇرگىزىپ كەلە جاتقان باس باسىلىم ەكەنىندە داۋ جوق. اسىلى, ول انا ءتىلىمىزدى دامىتۋ, كوركەم ويىمىزدى ورىستەتۋ جولىنداعى مەكتەپ بولدى. بۇرىنىراقتا ءبىر جيىندا «گازەتتىڭ ءوزى ءبىر كۇندىك, ءسوزى مىڭ جىلدىق» دەپ ايتقانىم بار ەدى. شىنىندا دا گازەت ءسوزى – تاسقا باسىلعان تاريح. جىلداردى جىلعا جالعاستىراتىن شەجىرە. ال ءجۇز جاساعان «ەگەمەن» – ءتىرى تاريحىمىز, عاسىرلىق شەجىرەمىز. باسىلىمنىڭ كوتەرمەگەن تاقىرىبى, قوزعاماعان ماسەلەسى, بارماعان سالاسى جوق دەۋگە بولادى. كوبىرەك وقيمىن. كوز ناشار, ەكى كوزىم دە اينەك بولعانىمەن, كۇندەلىكتى كەلەتىن پوشتانىڭ ءبىرىن قالدىرماي, تۇتاس قاراپ شىعامىن. رەسپۋبليكالىق گازەتتىڭ ءبارى كەلەدى ۇيگە. قالاي ونى وقىمايمىن؟ تىڭ دۇنيە وقىعان سايىن بۇرىن بىلەتىنىم تۇككە تۇرمايتىنداي كورىنەدى. ادەتتە قالامگەر قاۋىمى جازۋشى جانە جۋرناليست دەگەن ءبىر-بىرىنە تىلەكتەس, ءبىر-بىرىمەن نيەتتەس ەكى توپتان تۇرادى. جازۋشى قيال ساۋىپ, ويدان وقيعا قۇراپ, كەيىپكەر جاسايدى. ەكىنشىسى ومىردە بولعان وقيعانى بايانداپ, وعان قاتىستى ادامداردى قارەكەت-قيمىلىمەن كورسەتىپ, دەرەكتەندىرىپ, اقيقاتىن جازادى. زامان وزگەردى, قوعام جاڭعىردى, سوعان سايكەس جۋرناليستكە دەگەن كوزقاراس تا وزگەردى. قازىرگى جۋرناليست حابار-وشار عانا جازىپ جۇرتشىلىقتى جاڭالىقتارمەن عانا تانىستىرىپ وتىراتىن ءتىلشى ەمەس. بيىك مىنبەرلەردەن وي تولعاپ, ەلدى ەرتەڭگە جەتەلەيتىن قايراتكەرگە, شىندىق ءۇشىن جان ۇرىپ, جار سالاتىن كۇرەسكەرگە اينالدى. ومىردە ولار ارالاسپايتىن سالا, ولار قاتىسپايتىن شارا جوق. بىزدە وسىنداي جۋرناليستەر ءوسىپ كەلە جاتىر. سوندىقتان ولارعا حابار-وشار تاسۋشى دەپ قاراماي, قايراتكەر دەپ قاراۋ كەرەك.العاشقى ادىمىنان قازاققا قازاق اتىن قايتارىپ بەرگەن بۇل گازەت ءتول تاريحىنان ايىرىلىپ قالا جازداعان حالقىمىزدىڭ تاريحىن ءتىرىلتىپ كۇرەسكەرلىك, ەڭبەككەرلىك رۋحىمىزدى اسقاقتاتا تۇسۋگە ءتيىس. ال بۇعان جاس قالامگەرلەر بەلسەنە اتسالىساتىنىنا سەنىمىم كامىل! سارباس اقتاەۆ,جازۋشى