ۇجىمدىق قاۋىپسىزدىك تۋرالى شارت ۇيىمىنا مۇشە ەلدەردەن ەسىرتكىگە قارسى وپەراتسيا بارىسىندا 5 توننادان استام ەسىرتكى تاركىلەندى, دەپ حابارلايدى Egemen.kz.
ۇجىمدىق قاۋىپسىزدىك تۋرالى شارت ۇيىمىنا (ۇقشۇ) مۇشە ەلدەر اراسىندا وتكەن «كانال – گرانيتنىي باستيون» دەپ اتالعان وپەراتسيا بارىسىندا قۇزىرلى ورگانداردىڭ كومەگىمەن 5 036,6 كەلى ەسىرتكى تاركىلەندى.
ۇقشۇ-نىڭ ءباسپاسوز حاتشىسى ۆلاديمير زاينەتدينوۆتىڭ ايتۋىنشا, سۋبايماقتىق ەسىرتكىگە قارسى وپەراتسيا 21-25 ماۋسىم ارالىعىندا ءوتتى. ونىڭ ماقساتى – ۇجىمدىق قاۋىپسىزدىكتى قامتاماسىز ەتۋ, ۇيىمعا مۇشە ەلدەردە جاڭا پسيحواكتيۆتى زاتتار, اپيىن مەن باسقا دا ەسىرتكى تۇرلەرىنىڭ تارالۋىن بولدىرماۋ ماقساتىندا ءوزارا تىعىز بايلانىستا جۇمىس ىستەۋ.
وپەراتسيانى وتكىزۋ بويىنشا حالىقارالىق ۇيلەستىرۋ شتابى تاجىكستان استاناسى دۋشانبەدە ورنالاستى. اتالعان ءىس-شاراعا ۇقشۇ-عا مۇشە ەلدەردىڭ قۇقىق قورعاۋ, شەكارا قورعاۋ, كەدەن قۇرىلىمدارى, قاۋىپسىزدىك قىزمەتتەرى مەن مەملەكەتتىك قارجىنى بارلاۋ بولىمشەلەرى قاتىستى.
ايتۋلى شاراعا 14 300-دەن استام قۇزىرلى ورگان قىزمەتكەرلەرى تارتىلدى. تاركىلەنگەن ەسىرتكىلەردىڭ ىشىندە 4,8 كەلى اپيىن, 11 كەلىدەن استام گاشيش, 3,5 كەلىدەن استام گەروين, 5 توننادان استام ماريحۋانا جانە 17 كەلىدەن استام سينتەتيكالىق ەسىرتكى بولدى.
سونداي-اق, 543 ەسىرتكى قىلمىسى, سونىمەن قاتار 3 ەسىرتكى ساتۋدان تۇسەتىن تابىستى زاڭداستىرۋ فاكتىسى انىقتالدى. ولار ەسىرتكىدەن تۇسكەن 3,43 ملن رۋبل تابىستى زاڭداستىرعىسى كەلگەن. ناتيجەسىندە 379 ادام جاۋاپقا تارتىلىپ, 83 قارۋ مەن 1 276 وق-ءدارى تاركىلەندى.
سونىمەن قاتار, ەسىرتكىگە قارسى وپەراتسيانىڭ ءوتۋ بارىسىن بىرنەشە حالىقارالىق ۇيىمدار باقىلادى.