قوستاناي وبلىسى پوليتسيا دەپارتامەنتى پوليتسيا قىزمەتكەرلەرىنەن كولىكپەن قاشقان كامەلەتكە تولماعانعا قاتىستى تۇسىنىك بەردى, دەپ حابارلايدى Egemen.kz.
ارقالىق قالاسى پاترۋلدىك پوليتسيا ۆزۆودىنىڭ اعا سەرجانتى امان وسپانوۆ ىشكى ىستەر ورگاندارىندا 2014 جىلدان بەرى قىزمەت ەتىپ كەلەدى.
ول ارىپتەسى مۇرات جاماليەۆ ەكەۋى سول كۇنى ءورت سوندىرۋگە قاتىستى وقيعا ورنىنان كەلە جاتقان ەدى. پوليتسەيلەر جول بويىندا Mitsubishi Pajero كولىگىن كورىپ, ونداعى جۇرگىزۋشىنىڭ كۇدىكتى ارەكەتىن بايقاپ قالادى. كولىك جۇرگىزۋشىسى قوزعالىس كەزىندە قايتا-قايتا كىلت توقتاي بەرگەن كورىنەدى.
كۋاگەر سابىرجان لەكەروۆتىڭ ايتۋىنشا, 31 مامىر كۇنى جانىبەك كوشەسى بويىندا پاترۋلدىك ماشينا جول تالعامايتىن كولىكتى قۋىپ جەتىپ توقتاتۋعا تىرىسقان. الايدا دجيپ جۇرگىزۋشىسى ەسكەرتۋلەرگە قاراماستان, جىلدامدىعىن تۇسىرمەستەن جۇيتكي جونەلگەن. قاتتى جۇرگەن كولىك كوشە بويىندا جۇرگەن ادامدارعا قاۋىپ توندىرگەن.
پوليتسيا قىزمەتكەرىنىڭ سوزىنشە, بۇل وقيعادا باستى ماقسات قايعىلى وقيعاعا جول بەرمەۋ بولدى.
«جول بويىندا ادامدار بولدى جانە ولارعا قاتەر ءتوندى. سوندىقتان اتالعان كولىك قۇرالىن توقتاتۋ تۋرالى شەشىم جاسادىق. ەسكەرتۋ رەتىندە تاپانشادان اۋاعا وق اتتىم, الايدا كولىك توقتامادى. كەيىننەن كولىكتىڭ ارتقى دوڭگەلەگىن كوزدەپ وق اتتىم. دوڭگەلەگى جارىلسا دا, ول 500 مەتر جەردەگى ۇيىنە دەيىن ءجۇرىپ باردى. سول كەزدە عانا كولىكتى ءجاسوسپىرىم تىزگىندەگەنىن بايقادىم. كولىك بيىك بولعاندىقتان ونى كىم باسقارىپ وتىرعانىن الدىندا كورمەگەن ەدىك», دەدى امان وسپانوۆ.