نۇر-سۇلتان قالاسىندا «قاۋىپسىز قالا» جوباسى اياسىندا 7500 بەينەباقىلاۋ كامەراسى ورناتىلادى, دەپ حابارلايدى Egemen.kz
بۇگىنگى تاڭدا قالادا پيلوتتىق جوبادا 1100-دەن استام بەينەباقىلاۋ كامەراسى جۇمىس ىستەيدى. بەينەكامەرالاردى مەكەنجايلار مەن نىساندارعا ورناتۋ اۋدان اكىمدىكتەرى مەن نۇر-سۇلتان قالاسىنىڭ پوليتسيا دەپارتامەنتى ۇسىنعان ءتىزىم بويىنشا جۇرگىزىلەدى.
«تاجىريبە كورسەتىپ وتىرعانداي, كۇن ساناپ دامىپ جاتقان الەمدە قۇقىق بۇزۋشىلىقتىڭ الدىن الۋ ىسىنە دەن قويۋ قاجەت. بەينەباقىلاۋ كامەرالارىنا يەلىك ەتۋ جەدەل باسقارۋ ورتالىعىنا (جبو) جانە نۇر-سۇلتان قالاسىنىڭ پوليتسيا دەپارتامەنتىنە بەرىلدى. وندا وپەراتورلار كەزەكشىلىك ەتەدى. ولار وقيعا بولعان بەتتە وسى اۋدانداعى پوليتسيا قىزمەتكەرلەرىنە دەرەۋ حابار بەرەدى», دەپ اتاپ ءوتتى ەلوردالىق تسيفرلاندىرۋ باسقارماسىنىڭ باسشىسى بوتاگوز قاسابەك.
قاۋىپسىز قالا» جوباسى – بىرىكتىرىلگەن بەينەتىركەۋ جۇيەسى. دەرەكتەردى وڭدەۋ جۇيەسى ءارتۇرلى جاعدايدا ءتيىمدى جۇمىستاردى ۇيىمداستىرۋعا مۇمكىندىك بەرەدى.
قاۋىپسىزدىكتى قامتاماسىز ەتۋدەن باسقا, جوبا قالانىڭ تىنىس-تىرشىلىگىنە اناليز جۇرگىزۋدى اۆتوماتتاندىرۋعا, سونداي-اق سونىڭ نەگىزىندە شەشىمدەر قابىلداۋعا مۇمكىندىك بەرەدى. بەينەكامەرالار تاۋلىك بويى قوسۋلى بولادى.
«قاۋىپسىز قالا» جوباسى ىسكە قوسىلعان ساتتەن باستاپ وڭ ناتيجە بايقالادى. ماسەلەن, 2021 جىلدىڭ ءبىرىنشى توقسانىندا قىلمىستىڭ اشىلۋى جاقساردى, قوعامدىق ورىنداردا جاسالعان قىلمىستاردىڭ سانى 53% (8 502-دەن 4 000-عا دەيىن), كوشەلەردە جاسالعان قىلمىستاردىڭ سانى 48,2% (3 381-دەن 1 752-گە دەيىن) ازايدى. 2020 جىلى تىركەلگەن قىلمىستار سانى 30% تومەندەدى.