ماڭعىستاۋ وبلىسى تۇپقاراعان اۋدانىندا 90 جاستاعى اتاباي ازماعامبەتوۆ كوروناۆيرۋستان جازىلىپ شىقتى, دەپ حابارلايدى Egemen.kz.
بۇگىن اتاباي ازماعامبەتوۆ تۇپقاراعان اۋداندىق ورتالىق اۋرۋحاناسىنىڭ كوروناۆيرۋس ينفەكتسياسىنا ارنالعان بولىمىنەن ەمدەلىپ شىقتى. اتاباي اقساقال اتالعان بولىمگە كوروناۆيرۋس ينفەكتسياسى, وكپەنىڭ ەكى جاقتى قابىنۋى دياگنوزىمەن 24 مامىر كۇنى تۇسكەن.
تۇپقاراعان اۋداندىق ورتالىق اۋرۋحاناسىنىڭ باس دارىگەرى گۇلشات شالاباەۆا اقساقالدىڭ قازىرگى جاعدايى تۋرالى ايتتى.
«اتاباي اقساقال 20 مامىردان باستاپ اۋىرا باستاعان. قاريانىڭ ايتۋىنشا, دەنەسىندە السىزدىك بەلگىلەر پايدا بولعان. جانۇياسى بىزگە حابارلاسقاننان كەيىن, دارىگەرلەر شۇعىل تۇردە ۇيىنە بارىپ, دەنساۋلىعىن تەكسەردى. اقساقالدىڭ وكپەسىن تىڭداۋ ناتيجەسىندە جانە كومپيۋتەرلىك توموگرافيا قورىتىندىسىنا سايكەس ناۋقاستىڭ وكپەسىنىڭ 35 پايىزى زاقىمدالعانى انىقتالدى. اقساقال اۋرۋحاناعا 24 مامىردا قابىلداندى. بۇگىن دەرتتەن ايىعىپ, وتباسىمەن امان-ەسەن قاۋىشىپ وتىر», دەدى دارىگەر.