قر ەڭبەك جانە حالىقتى الەۋمەتتىك قورعاۋ مينيسترلىگىندە بالالار ەڭبەگىنىڭ ەڭ ناشار تۇرلەرىنە قارسى كۇرەس جونىندەگى ۇيلەستىرۋ كەڭەسىنىڭ وتىرىسى ءوتتى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ءىس-شاراعا قر ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ, قر ادام قۇقىقتارى جونىندەگى ۋاكىلى ەلۆيرا ءازىموۆا, تۇركىستان جانە قاراعاندى وبلىستارى اكىمدەرىنىڭ ورىنباسارلارى ارمان ءسابيتوۆ پەن ەرمەك الپىسوۆ, قر بعم بالالار قۇقىقتارىن قورعاۋ كوميتەتىنىڭ توراعاسى ەسەنعازى يمانعاليەۆ, قر ءىىم اكىمشىلىك پوليتسيا كوميتەتى توراعاسىنىڭ ورىنباسارى الەكسەي ميليۋك جانە باسقالار قاتىستى.
وتىرىستى اشقان اقمادي سارباسوۆ 2021 جىل حالىقارالىق بالالار ەڭبەگىنە قارسى كۇرەس جىلى دەپ جاريالانعانىن اتاپ ءوتتى.
حالىقارالىق ەڭبەك ۇيىمىنىڭ (بۇدان ءارى – حەۇ) دەرەكتەرى بويىنشا جۇمىس ىستەيتىن بالالار سانى سوڭعى ونجىلدىقتا 38%-عا قىسقارعان, الايدا 152 ملن بالا بۇرىنعىسىنشا بالالار ەڭبەگىنە تارتىلعان.
«بالالار ەڭبەگى بالانىڭ دەنساۋلىعىنا قاۋىپ توندىرەتىن نەمەسە ونىڭ ءبىلىم الۋىنا كەدەرگى كەلتىرەتىن نە ونىڭ دەنساۋلىعى مەن فيزيكالىق, اقىل-وي, رۋحاني, مورالدىق جانە الەۋمەتتىك دامۋىنا نۇقسان كەلتىرەتىن جۇمىستى بىلدىرەدى. بالالاردىڭ پروبلەمالارىن شەشۋ ۇلتتىق باسىم مىندەتتەردىڭ ءبىرى بولىپ تابىلاتىنى كەزدەيسوق ەمەس», دەدى ۆيتسە-مينيستر.
قازاقستان حەۇ-نىڭ «جۇمىسقا قابىلداۋدىڭ ەڭ تومەنگى جاسى تۋرالى» جانە «بالالار ەڭبەگىنىڭ ەڭ ناشار تۇرلەرىنە تىيىم سالۋ جانە ولاردى جويۋ جونىندەگى شۇعىل شارالار تۋرالى» نەگىزگى كونۆەنتسيالارىن راتيفيكاتسيالادى.
سونداي-اق رەسپۋبليكادا بالالار ەڭبەگىنىڭ ەڭ ناشار تۇرلەرىن جويۋ جونىندەگى 2020-2022 جىلدارعا ارنالعان ءىس-شارالار جوسپارى جانە قازاقستان رەسپۋبليكاسى ۇكىمەتىنىڭ ادام ساۋداسىنا بايلانىستى قىلمىستاردىڭ الدىن الۋ, جولىن كەسۋ جانە ولارعا قارسى كۇرەس جونىندەگى 2021-2023 جىلدارعا ارنالعان ءىس-شارالار جوسپارى ىسكە اسىرىلۋدا, ولار:
- بالالار ەڭبەگىنىڭ ەڭ ناشار تۇرلەرىمەن كۇرەسۋگە;
- ءماجبۇرلى ەڭبەكتى, ونىڭ ىشىندە ماقتا القاپتارىندا, تەمەكى پلانتاتسيالارىندا, قۇرىلىس جانە وزگە دە وبەكتىلەردە بالالار ەڭبەگىن پايدالانۋدى بولدىرماۋعا, بالا ەڭبەگىن پايدالانۋعا جول بەرمەۋگە مەملەكەتتىك باقىلاۋ جۇرگىزۋگە;
- قۇزىرەتتى ورگاندار اراسىندا ادام ساۋداسى مەن بالالار پورنوگرافياسىنا بايلانىستى جانە وسىنداي قىزمەتتەرگە سۇرانىس تۋدىراتىن بۇقارالىق اقپارات قۇرالدارىنداعى جانە ينتەرنەتتەگى جارنامالىق حابارلاندىرۋلار مەن اقپاراتتىق ماتەريالدارعا قاتىستى مونيتورينگ جۇرگىزۋگە جانە دەرەكتەر الماسۋعا باعىتتالعان.
كامەلەتكە تولماعانداردىڭ ەڭبەك قۇقىقتارىن قورعاۋعا باعىتتالعان باقىلاۋدى ۋاكىلەتتى مەملەكەتتىك ورگاندار (ەڭبەك ينسپەكتسياسى, پروكۋراتۋرا, ءبىلىم باسقارماسى) جۇزەگە اسىرادى.
«مەملەكەتتىك ەڭبەك ينسپەكتورلارى تەكسەرۋ بارىسىندا 2019 جانە 2020 جىلدارى كامەلەتكە تولماعانداردى ەڭبەككە زاڭسىز تارتۋدىڭ 5 فاكتىسىن انىقتادى, ولار بويىنشا جۇمىس بەرۋشىلەر اكىمشىلىك جاۋاپكەرشىلىككە تارتىلدى. اعىمداعى جىلى سقو-دا 1 فاكت انىقتالدى, ول بويىنشا دا زاڭدى تۇلعا اكىمشىلىك جاۋاپكەرشىلىككە تارتىلدى. قر بعم مالىمەتىنشە, 2020 جىلى «تۇنگى قالاداعى بالالار» جەدەل-الدىن الۋ ءىس-شاراسى اياسىندا 136 فاكت انىقتالدى, سونىمەن قاتار بۇل فاكتىلەر بويىنشا اقپارات جۇمىس بەرۋشىلەرگە قاتىستى ءتيىستى شارالار قابىلداۋ ءۇشىن جەرگىلىكتى ەڭبەك ينسپەكتسيالارىنا بەرىلمەگەن», دەپ حابارلادى اقمادي سارباسوۆ.
تالداۋ كورسەتكەندەي, كامەلەتكە تولماعانداردىڭ ەڭبەگىن پايدالانۋعا كوبىنەسە جازعى دەمالىس كەزىندە رۇقسات ەتىلەدى. شاعىن بيزنەس سۋبەكتىلەرىندە, بازارلارداعى ساۋدا ورىندارىندا, كولىك جۋ ورىندارىندا جانە اۆتوكولىك قۇرالدارىن جوندەۋ ستانتسيالارىندا, قوعامدىق تاماقتانۋ پۋنكتتەرىندە 12 جاستان 18 جاسقا دەيىنگى بالالار ەڭبەككە تارتىلعان. ەڭ كوپ تارالعان بۇزۋشىلىق - ەڭبەك شارتىنىڭ بولماۋى.
وتىرىس بارىسىندا تۇركىستان جانە قاراعاندى وبلىستارى اكىمدەرىنىڭ ورىنباسارلارى 2020 جىلى بالالار ەڭبەگىن پايدالانۋدىڭ انىقتالعان رەزونانستىق جاعدايلارى تۋرالى حاباردار ەتتى. قر بعم جانە قر ءىىم وكىلدەرى بالالار ەڭبەگىن پايدالانۋ ماسەلەسى بويىنشا جۇرگىزىلىپ جاتقان جۇمىستار تۋرالى ايتىپ بەردى.
تالقىلاۋدى قورىتىندىلاي كەلە اقمادي سارباسوۆ:
- 2020-2022 جىلدارعا ارنالعان بالالار ەڭبەگىنىڭ ەڭ ناشار تۇرلەرىن جويۋ جونىندەگى ءىس-شارالار جوسپارىن ىسكە اسىرۋ جونىندەگى جۇمىستى جالعاستىرۋدى;
-ۇيلەستىرۋ كەڭەسىنىڭ جوسپارىنا سايكەس وڭىرلەردە, كاسىپورىندار مەن ۇجىمداردا تۇراقتى اقپاراتتىق-ءتۇسىندىرۋ جۇمىسىن كۇشەيتۋدى جانە جۇرگىزۋدى;
- تابىسى از وتباسىلاردى انىقتاۋدى قامتاماسىز ەتۋ جانە ولاردىڭ كەدەيلىك جاعدايىنان شىعۋى ءۇشىن كەشەندى كومەك كورسەتۋدى («ەڭبەك» مەملەكەتتىك باعدارلاماسى شەڭبەرىندە جۇمىسقا ورنالاستىرۋ, گرانتتار بەرۋ جانە ت. ب.)
- قر بعم توقسان سايىن قر ەڭبەكمينىنە بالالار ەڭبەگىنىڭ انىقتالعان فاكتىلەرىنىڭ سانى تۋرالى اقپارات جولداۋدى;
- قر ءىىم كورسەتىلگەن وتباسىلارداعى بالالاردىڭ قۇقىقتارىن قورعاۋ ءۇشىن قر ەڭبەكمينىنە جانە بعم-گە قولايسىز وتباسىلار تۋرالى اقپارات جولداۋدى;
- قر باس مەملەكەتتىك ينسپەكتورى بالالار ەڭبەگىنىڭ ەڭ ناشار تۇرلەرىن انىقتاۋ ماسەلەسى بويىنشا مەملەكەتتىك ەڭبەك ينسپەكتورلارىنىڭ بىلىكتىلىگىن ارتتىرۋدى ۇيىمداستىرۋدى ۇسىندى.