بەلارۋستەن حالىقارالىق ىزدەۋدەگى ادام ەلگە ەكستراديتسيالاندى, دەپ حابارلايدى Egemen.kz باس پروكۋراتۋرا تاراتقان اقپاراتقا سىلتەمە جاساپ.
«بۇگىن باس پروكۋراتۋرانىڭ جانە قازاقستان رەسپۋبليكاسى ءىىم ينتەرپولىنىڭ قىزمەتكەرلەرى بەلورۋستەن ۆلاديمير تۋرگۋنوۆتى ەكستراديتسيالادى. ول قارۋ قولدانۋ ارقىلى قاراقشىلىق شابۋىل جاساۋ, ادام ۇرلاۋ جانە 100 ملن تەڭگەدەن استام سوماعا بوتەننىڭ مۇلكىن ۇرلاۋدى ۇيىمداستىرۋ قىلمىستارى بويىنشا كۇدىككە ىلىككەن. قىلمىستى جاساعاننان كەيىن كۇدىكتى قىلمىستىق قۋدالاۋ ورگاندارىنان جاسىرىنعان. وسىعان بايلانىستى حالىقارالىق ىزدەۋ جاريالانعان», دەلىنگەن ۆەدومستۆو اقپاراتىندا.
باس پروكۋراتۋرا مالىمەتىنشە, قازىرگى ۋاقىتتا ۆ. تۋرگۋنوۆ نۇر-سۇلتان قالاسىنىڭ ۋاقىتشا ۇستاۋ وقشاۋلاعىشىنا قامالدى.