سەناتور دانا نۇرجىگىتوۆا الماتى وبلىسى ەڭبەكشىقازاق اۋدانى اكىمدىگىنىڭ باسشىلارىمەن كەزدەسىپ, بالالاردىڭ قۇقىقتارىن قورعاۋ ماسەلەلەرىن تالقىلادى, دەپ حابارلايدى Egemen.kz.
كەزدەسۋ بارىسىندا بالالاردىڭ قۇقىقتارىن ساقتاۋ جانە ولاردى اتا-انالار مەن ۋاكىلەتتى مەملەكەتتىك ورگاندار تاراپىنان قورعاۋ ماسەلەلەرى تالقىلاندى.
سەناتور سونداي-اق ەلىمىز پرەزيدەنتى قاسىم-جومارت توقاەۆتىڭ اعىمداعى جىلعى قاڭتاردا VII سايلانعان پارلامەنت سەسسياسىنىڭ اشىلۋىندا بەرگەن تاپسىرمالارىن ىسكە اسىرۋ ماقساتىندا دەپۋتاتتار باستاماسىمەن ازىرلەنگەن بالالار قۇقىقتارىن قورعاۋ تۋرالى زاڭ جوباسى قازىرگى كەزدە پارلامەنتتە تالقىلانىپ جاتقانى جايىندا كەزدەسۋگە قاتىسۋشىلاردى حاباردار ەتتى.
«بالالار ءبىزدىڭ بولاشاعىمىز. ءبىزدىڭ باستى مىندەتىمىز – ولاردىڭ داۋىستارىن ەستۋ, ولاردىڭ ايتقانىنا دەن قويۋ. مەملەكەتتىك ورگاندار بالالاردىڭ قۇقىقتارىن قورعاۋعا جانە ونى باسقالاردان تالاپ ەتۋگە مىندەتتى», دەدى دانا نۇرجىگىتوۆا.
سەناتور حالىقتىڭ الەۋمەتتىك وسال توپتارى قاتارىنداعى بالالار مەن قانداستار بالالارىنىڭ قۇقىقتارىن قورعاۋ پروبلەمالارىنا ەرەكشە نازار اۋداردى. اتاپ ايتقاندا, كەزدەسۋدە بالالاردى قۇجاتتامالىق قامتاماسىز ەتۋ جانە ولاردىڭ ءبىلىم الۋ قۇقىقتارىن ىسكە اسىرۋ ماسەلەلەرى كوتەرىلدى.
دانا نۇرجىگىتوۆا سونىمەن قاتار ەسىك گۋمانيتارلىق-ەكونوميكالىق كوللەدجى مەن وتباسى ۇلگىسىندەگى بالالار ۇيىندە بولىپ, وسى مەكەمەلەردىڭ وقىتۋشىلار قۇرامىمەن جانە تاربيەشىلەرىمەن كەزدەستى. كەزدەسۋ بارىسىندا ونلاين-ءبىلىم بەرۋ ساپاسى, بالالاردىڭ پسيحولوگيالىق جاعدايى جانە وقىتۋشىلار مەن تاربيەشىلەردى الەۋمەتتىك قولداۋ ماسەلەلەرى كوتەرىلدى.