قىزمەت بابىن اسىرا پايدالاندى دەپ ايىپتالعان ماڭعىستاۋ وبلىسى دەنساۋلىق ساقتاۋ باسقارماسىنىڭ بۇرىنعى باستىعى جامال جامانباەۆاعا قاتىستى قىلمىستىق ءىس بويىنشا اقتاۋ قالالىق سوتىنىڭ ۇكىمى جاريالاندى, دەپ حابارلايدى Egemen.kz zakon.kz سايتىنا سىلتەمە جاساپ.
سوتتا انىقتالعانداي, جامال جامانباەۆا ماڭعىستاۋ وبلىسىنىڭ دەنساۋلىق ساقتاۋ باسقارماسىنىڭ باسشىسى بولا وتىرىپ, بەلگىلەنگەن قىزمەتتىك مىندەتتەر مەن شەكتەۋلەرگە قايشى ارەكەتكە بارىپ, 2020 جىلدىڭ تامىزىندا «سentropharm» جشس-مەن ءبىر جەردەن COVID-19 ينفەكتسياسىنىڭ ەل اۋماعىندا تارالۋىنا بايلانىستى 222 000 000 تەڭگە سوماسىنداعى 6 جىلجىمالى رەنتگەن اپپاراتىن ساتىپ الۋ تۋرالى كەلىسىم جاساسقان.
جابدىقتاردى ساتىپ الۋ ءۇشىن 2020 جىلدىڭ بيۋدجەتتىك جوسپارىنا بيۋدجەتتىك ءوتىنىم جولداپ, وندا نارىقتىق قۇننان دا جوعارى باعا كورسەتىلگەن. قىسقاسى, وبلىستىق ءماسليحاتتان مەديتسينالىق تەحنيكانى ساتىپ الۋعا قاراجات ءبولۋ سۇرالعان, ناتيجەسىندە قالالىق ءماسليحاتتىڭ شەشىمى بويىنشا ول قاراجات بولىنگەن.
«الايدا, مەملەكەتتىك مەكەمەلەردى ماتەريالدىق-تەحنيكالىق قامتاماسىز ەتۋ تالاپتارىنا سايكەس, بۇل ارادا وبلىستىق قازىناشىلىق دەپارتامەنتىنىڭ كەلىسىمى تىركەۋدەن وتپەي قالادى. وسىدان كەيىن ج.جامانباەۆا ۆەدومستۆوسىنا باعىنىشتى مەديتسينالىق مەكەمەلەر ارقىلى ساتىپ الۋ ماقساتىندا اۋداندىق ەمحانالاردىڭ ديرەكتورلارىمەن جىلجىمالى رەنتگەن اپپاراتتارىن ساتىپ الۋ ءۇشىن «سentropharm» جشس-مەن كەلىسىم جاساسۋدى تالاپ ەتكەن», دەپ حابارلادى سوت.
جامال جامانباەۆا قىمبات باعادا جابدىقتاردى ساتىپ الۋ ارقىلى مەملەكەتكە 29 540 000 تەڭگە زالال كەلتىرگەن.
«سوتقا دەيىنگى تەرگەۋ بارىسىندا ول كىناسىن مويىندادى, كەلتىرىلگەن زياننىڭ ورنى تولتىرىلدى, سوعان بايلانىستى كىناسىن مويىنداۋ تۋرالى پروتسەسسۋالدىق كەلىسىم جاسالدى. سوت تالقىلاۋىندا سوتتالۋشى ءوز كىناسىن مويىندادى, قىلمىستىق ءىس ماتەريالدارى نەگىزىندە جينالعان دالەلدەمەلەردىڭ ماڭىزدىلىعى مەن رۇقسات ەتىلۋىنە قاتىستى داۋ تۋدىرمادى», دەپ اتاپ ءوتتى سوت.
جازا تاعايىنداۋ كەزىندە سوت سوتتالۋشىنىڭ كامەلەتكە تولماعان بالالارى بارىن, ونىڭ جاقسى جاقتارىن, بۇرىن قىلمىستىق جاۋاپكەرشىلىككە تارتىلماۋى جانە جازاسىن جەڭىلدەتەتىن باسقا دا ءمان-جايلار ەسكەرىلدى. سوت جازانى اۋىرلاتاتىن ءمان-جايلاردى انىقتاعان جوق.
سوت ۇكىمىمەن جامال جامانباەۆا قر قىلمىستىق كودەكسىنىڭ 361-بابى 4-بولىگىنىڭ 3-تارماعى بويىنشا 3 جىل 6 ايعا باس بوستاندىعىن شەكتەۋ جازاسىن ارقالاپ, كىنالى دەپ تانىلدى. مەملەكەتتىك قىزمەتتە, سۋديادا, جەرگىلىكتى اتقارۋشى ورگانداردا, ۇلتتىق بانكتە جانە ونىڭ قۇرىلىمدىق بولىمشەلەرىندە, قارجى نارىعىن جانە قارجى ۇيىمدارىن, مەملەكەتتىك ۇيىمدار مەن كۆازيمەملەكەتتىك سەكتور سۋبەكتىلەرىن رەتتەۋ, باقىلاۋ جانە قاداعالاۋ جونىندەگى ۋاكىلەتتى ورگاندا لاۋازىمدى قىزمەت اتقارۋ قۇقىعىنان ءومىر بويىنا ايىرىلدى.
سوت ۇكىمى زاڭدى كۇشىنە ءالى ەنگەن جوق.
ايتا كەتەيىك, ول ماڭعىستاۋ وبلىسىنىڭ دەنساۋلىق ساقتاۋ باسقارماسىنىڭ باستىعى بولىپ 2020 جىلدىڭ مامىر ايىندا تاعايىندالدى. بۇعان دەيىن ول كوپتەگەن جىلدار بويى ماڭعىستاۋ وبلىستىق پەريناتالدىق ورتالىعىن باسقارعان. ونىڭ قاماۋعا الىنعانى تۋرالى اقپارات 2021 جىلى 4 اقپاندا بەلگىلى بولدى.