دۇنيە جۇزىندەگى كورەرمەن قاۋىم, ونىڭ ىشىندە برازيليا, ارگەنتينا, بوليۆيا, ۆەنەسۋەلا, كولۋمبيا, پاراگۆاي, پەرۋ, ۋرۋگۆاي, چيلي, ەكۆادور, سونداي-اق رەسەي, پولشا, بەلگيا, سينگاپۋر, شۆەتسيا مەن اۋستراليادا تۇراتىن وتانداستارىمىز قازاقستان حالقىنىڭ بىرلىگى مەرەكەسى اياسىندا «استانا وپەرا» تەاترىنىڭ ەكسكليۋزيۆتى سپەكتاكلدەرىن تاماشالاي الادى.
وپەرا جانە بالەت سپەكتاكلدەرىنىڭ ونلاين كورسەتىلىمى تەاتردىڭ YouTube پلاتفورماسىندا جۇزەگە اسىرىلادى, سونىمەن قاتار تاراتىلىمنىڭ ۋاقىتى مەن كۇنى تۋرالى تولىق اقپاراتتى الەمنىڭ 16 ەلىندەگى قازاقستان ەلشىلىگىنىڭ وكىلدەرى تاراتاتىن بولادى.
– مادەنيەتتىڭ ادام ءۇشىن, ىنتىماعى ءۇشىن ماڭىزى زور. سوندىقتان ءبىز قازاقستان حالقىنىڭ بىرلىگى كۇنى الەمنىڭ ءار بۇرىشىندا سپەكتاكلدەرىمىزدى ونلاين كورسەتۋ جونىندە شەشىم قابىلدادىق. وعان 16 ەل قاتىسادى, العاشقىلاردىڭ ءبىرى بولىپ قازاقستان رەسپۋبليكاسىنىڭ رەسەي, برازيليا, پولشا مەن شۆەتسياداعى ەلشىلىكتەرى كەلىسىم ءبىلدىردى. ونلاين-افيشاعا 5 سپەكتاكل ەندى 28 ءساۋىر كۇنى وتەتىن ا.اداننىڭ «كورسار» بالەتى, كەلەسى كۇنى جۇرتشىلىق نازارىنا پ.ي.چايكوۆسكيدىڭ «اققۋ كولى» تانىمال بالەتى ۇسىنىلماق, ال وپەرا ونەرىن سۇيەر قاۋىم ءۇشىن 30 ساۋىرگە دج.ءپۋچچينيدىڭ «تۋراندوت» سپەكتاكلىن ازىرلەدىك. 1 جانە 2 مامىر كۇندەرى حالىقارالىق اۋديتوريامىزدى الەمدىك حورەوگرافيا جاۋھارلارى – ل.مينكۋستىڭ «دون كيحوت» جانە ا.اداننىڭ «كورسار» بالەتتەرىمەن قۋانتپاقپىز, – دەدى قازاقستاننىڭ ەڭبەك سىڭىرگەن قايراتكەرى, «استانا وپەرا» تەاترىنىڭ ديرەكتورى عالىم احمەدياروۆ.
بارلىق ونلاين كورسەتىلىمدەر شىعارىلعان كۇنى ساعات 00.00-دەن باستاپ كەلەسى كۇنى ساعات 9.00-گە دەيىن تەاتردىڭ YouTube-ارناسىندا قازاقستان ەلشىلىكتەرىنىڭ رەسمي دەرەككوزدەرىندەگى سىلتەمەلەر بويىنشا قولجەتىمدى بولادى. ونلاين سپەكتاكلدەردەن بولەك, ەلوردا تۇرعىندارى مەن قوناقتارىنا 1 مامىردا «استانا وپەرانىڭ» كامەرالىق زالى ساحناسىندا وتەتىن «ماحاببات پەن دوستىق ءۇنى» مەرەكەلىك كونتسەرتى ۇسىنىلادى.
– ەلىمىزدىڭ بارلىق تۇرعىندارىن تاماشا, جارقىن ءارى ىزگى مەرەكە – قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن. وسى كۇنى ءار وتباسىعا مىقتى دەنساۋلىق, اماندىق, بەيبىتشىلىك تىلەگىم كەلەدى. ەل تاۋەلسىزدىگىنىڭ 30 جىلى ىشىندە قازاقستاندىقتاردىڭ بەيبىتشىلىك پەن كەلىسىمدە تۇرىپ جاتقاندىعى قۋانتادى. بارشامىزدىڭ مۋزىكاعا دەگەن ماحابباتىمىز بىرلىگىمىزدى ارتتىرا بەرسىن, – دەپ ءسوزىن قورىتىندىلادى تەاتر ديرەكتورى.
مەرەكەلىك كونتسەرتكە وپەرا سوليستەرى مەن وركەستر ارتىستەرى قاتىسادى. باعدارلامادا قوناقجاي قازاق جەرىندە, ءبىر شاڭىراق استىندا تاتۋ-ءتاتتى ءومىر ءسۇرىپ كەلە جاتقان ۇلىستاردىڭ رومانستارى, حالىق اندەرى, اسپاپتىق مۋزىكاسى قامتىلعان. ۇلتتىق مۋزىكالىق داستۇرلەردىڭ سانالۋاندىعى كورەرمەندەرگە مەرەكەلىك كوڭىل كۇي سىيلايتىنى انىق.