اگرارلىق سالاعا بولىنەتىن سۋبسيديالار ءتيىمسىز جانە ماقساتسىز جۇمسالۋدا. جالعان كەلىسىمشارتتار جاسالىپ, شىندىققا جاناسپايتىن اقپاراتتاردىڭ بەرىلەتىنى دە جاسىرىن ەمەس. سونىڭ سالدارىنان قاراجات جەلگە ۇشىپ جاتىر, دەپ حابارلايدى Egemen.kz
سەناتور اندرەي لۋكين جاعدايدى جاقسارتۋ ءۇشىن قازىرگى ەرەجەلەردى قايتا قاراۋدى ۇسىندى. ول ءوز ۇسىنىستارىن پرەمەر-ءمينيستردىڭ ورىنباسارى رومان سكلياردىڭ اتىنا جولداعان دەپۋتاتتىق ساۋالىندا باياندادى.
سەناتوردىڭ ايتۋىنشا, سوڭعى 5 جىلدا جەڭىلدىكپەن بەرىلەتىن نەسيە مەن سۋبسيدياعا 2,9 ترلن تەڭگە بولىنگەن. الايدا, سۋبسيديانى بەرۋ مەحانيزمى جابىق كۇيدە قالىپ وتىر جانە ەرەجەلەرى دە جەتىلدىرۋدى قاجەت ەتەدى. ءدال وسى سەبەپتەن بۇل سالادا سىبايلاس جەمقورلىق فاكتىلەرى ءجيى تىركەلۋدە.
«2018 - 2020 جىلدار ىشىندە مەملەكەتتىك باعدارلامانى ىسكە اسىرۋعا قاتىستى 144 قىلمىستىق ءىس تەرگەلگەن ەكەن. ونىڭ ىشىندە سىبايلاس جەمقورلىق قىلمىستارى بويىنشا 57 ءىس قوزعالعان. ال سۋبسيديانى جىمقىرۋ بويىنشا 87 سوتقا دەيىنگى تەرگەۋ جۇرگىزىلگەن. سالدارىنان مەملەكەتكە 2,1 ميلليارد تەڭگەدەن استام شىعىن كەلتىرىلدى», دەدى اندرەي لۋكين.
سونىمەن قاتار سەنات دەپۋتاتى ۇسىنىلعان اقپاراتتار مەن دەرەكتەردىڭ دۇرىستىعىنا تەك اۋىل شارۋاشىلىعى وندىرۋشىلەرى جاۋاپتى ەكەنىنە نازار اۋداردى. ال جاۋاپتى لاۋازىمدى تۇلعالار شارۋالاردىڭ وتىنىمدەرىن قىسقا مەرزىمدە قاراپ, دەرەكتەردىڭ تولىق ەكەنىنە عانا كوڭىل بولەدى.
«وسىعان وراي اگروونەركاسىپتىك كەشەندى سۋبسيديالاۋ ەرەجەلەرىن قايتا قاراعان ءجون دەپ ەسەپتەيمىن. سول ارقىلى اۋىل شارۋاشىلىعى وندىرۋشىلەرىنىڭ وتىنىمدەرىن تەكسەرۋ بويىنشا جەرگىلىكتى اتقارۋشى ورگانداردىڭ جانە سۋبسيديا تولەمدەرىن جۇرگىزەتىن جاۋاپتى لاۋازىمدى تۇلعالاردىڭ مىندەتتەرىن قاراستىرۋ قاجەت», دەدى اندرەي لۋكين.