قاجىمۇقان مۇڭايتپاسوۆتىڭ 150 جىلدىق مەرەيتويىنا وراي دارىندى سپورتشىلار تاربيەلەنەتىن جاڭا اۋلا كلۋبى اشىلدى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
نۇر-سۇلتان قالاسى اكىمدىگىنىڭ «استانا جاستارى» كمم جاستار ساياساتى ماسەلەلەرى باسقارماسىمەن بىرلەسىپ اشقان جاڭا اۋلا كلۋبى اتا-اناسىز قالعان بالالار مەن الەۋمەتتىك وسال وتباسىلاردان شىققان بالالارعا ارنالعان.
«بۇگىن ايتۋلى مەرەكەلىك شارا وتۋدە. «دينامو» دەنە شىنىقتىرۋ سپورت كەشەنىندە جاسوسپىرىمدەرگە ارنالعان جاڭادان سپورت سەكتسيالارى اشىلىپ جاتىر. ولاردى بىلىكتىلىگى جوعارى سپورت شەبەرلەرى تەگىن جاتتىقتىرادى. ونىڭ ىشىندە قازاقستان مەن ازيا چەمپيوندارى بار. الداعى ۋاقىتتا قازاق كۇرەسى سپورتىن دامىتۋ ويدا بار. ءبىزدىڭ باستى ماقساتىمىز – بالالاردى سپورتقا باۋلىپ, بولاشاقتا ەلگە تانىمال سپورتشىلاردى دايىنداۋ», – دەدى «دينامو» دەنە شىنىقتىرۋ سپورت قوعامى توراعاسىنىڭ ءبىرىنشى ورىنباسارى بولات رامازان ۇلى.
كلۋبتا بوكس, قويان-قولتىق ۇرىس, تاەكۆاندو سەكىلدى سپورت سەكتسيالارى, سونداي-اق ترەناجەر زالى جۇمىس ىستەيتىن بولادى.
«قالا باسشىسىنىڭ تاپسىرماسىنا سايكەس اۋلا كلۋبتارىنىڭ سانىن كوبەيتىپ وتىرمىز. اۋلا كلۋبتارى تەك قالانىڭ ورتالىعىندا عانا ەمەس, شەتكى ايماقتارىن دا قامتۋ كەرەك. بۇگىن 26-شى اۋلا كلۋبىن اشتىق. ال سارىارقا اۋدانىندا 4-ءشى اۋلا كلۋبى اشىلۋدا. نەگىزى باستى باعىت – الەۋمەتتىك از قامتىلعان وتباسىلارداعى بالالاردى اقىسىز تۇردە سپورتقا دايىنداپ, ۋاقىتتارىن ءتيىمدى پايدالانۋعا سەپتىگىمىزدى تيگىزۋ», – دەدى نۇر-سۇلتان قالاسى جاستار ساياساتى ماسەلەلەرى باسقارماسىنىڭ باسشىسى قايرات قامباروۆ.
قايرات قامباروۆتىڭ ايتۋىنشا, تاۋەلسىزدىكتىڭ 30 جىلدىعىنا وراي جىل سوڭىنا دەيىن اۋلا كلۋبتارىنىڭ سانىن 30-عا جەتكىزۋ جوسپارلانىپ وتىر.
ايتا كەتەيىك, ءىس-شارا قاتاڭ سانيتارلىق نورمالار مەن تالاپتاردى ساقتاي وتىرىپ وتكىزىلدى.