پرەمەر-ءمينيستردىڭ ورىنباسارى ەرالى توعجانوۆ ساياسي قۋعىن-سۇرگىن قۇرباندارىن اقتاۋ جونىندەگى كوميسسيانىڭ الداعى مىندەتتەر اتادى, دەپ حابارلايدى Egemen.kz
«حالقىمىزدا «وتكەنگە سالاۋات, كەلەشەككە امانات» دەگەن اتالى ءسوز بار. وتكەن تاريحىمىزدىڭ جاقسى جاقتارى بولعانىمەن اقتاڭداق تۇستارى دا از ەمەس. سول سەبەپتى ەلىمىزدىڭ تاۋەلسىزدىگىنىڭ 30 جىلدىعى اياسىندا قوعامىمىزدى كوپتەن تولعاندىرىپ, كوتەرىلىپ جۇرگەن تاريحتىڭ اقتاڭداق تۇستارىن ايقىنداپ, جازىقسىز سوتتالعان, قۋعىن-سۇرگىنگە ۇشىراعان ازاماتتاردى اقتاۋ ەلىمىزدىڭ, حالقىمىزدىڭ, قوعامنىڭ الدىندا تۇرعان ۇلكەن مىندەت رەتىندە قاراستىرۋعا بولادى», دەدى ەرالى توعجانوۆ ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.
بۇل رەتتە ەرالى توعجانوۆ پرەزيدەنت قاسىم-جومارت توقاەۆتىڭ ارناۋلى جارلىعىمەن ساياسي قۋعىن-سۇرگىن قۇرباندارىن تولىقتاي اقتاۋ جونىندەگى مەملەكەتتىك كوميسسيا قۇرىلعانىن اتاپ ءوتتى.
«مەملەكەتتىك كوميسسيا ەلىمىزگە بەلگىلى تاريحشى عالىمداردىڭ, قوعام قايراتكەرلەرىنىڭ, پارلامەنت دەپتۋتاتتارىنىڭ جانە مەملەكەتتىك ورگانداردىڭ وكىلدەرىنەن – 49 ادامنان تۇرادى. جالپى مەملەكەتتىك كوميسسيانىڭ الدىندا بىرنەشە ناقتى مىندەتتەر بار. بىرىنشىدەن, ساياسي قۋعىن-سۇرگىن قۇرباندارىنا قاتىستى تاريحي ادىلدىكتى قالپىنا كەلتىرۋ ماسەلەلەرى. ەكىنشىدەن, جازىقسىز سوتتالعان جانە ساياسي قۋعان-سۇرگىنگە ۇشىراعانداردى اقتاۋ پروتسەستەرىن عىلىمي زەردەلەۋ. سونىمەن قاتار جابىق مۇراعاتتارداعى قۋعىن-سۇرگىن جونىندەگى ماتەريالداردىڭ زەرتتەۋشىلەرگە قولجەتىمدى بولۋىن قامتاماسىز ەتۋ ماسەلەسى دە الدىمىزدا تۇرعان ۇلكەن سۇراقتاردىڭ ءبىرى. مۇنان بولەك, ەلىمىزدىڭ ازاتتىعى, تاۋەلسىزدىگى مەن تۇتاستىعى ءۇشىن كۇرەستە ەرلىك كورسەتكەن ساياسي قۋعىن-سۇرگىن قۇرباندارىن ماڭگى ەستە قالدىرۋ بويىنشا دا ۇسىنىستار ازىرلەۋ سياقتى ماڭىزدى مىندەتتەر جۇكتەلىپ وتىر. كوميسسياعا مەملەكەتتىك حاتشى قىرىمبەك كوشەرباەۆ جەتەكشىلىك ەتەدى. جارلىققا سايكەس, كوميسسيانىڭ جۇمىس ورگانى رەتىندە ءبىلىم جانە عىلىم مينيسترلىگى بەكىتىلگەن», دەدى ۇكىمەت باسشىسىنىڭ ورىنباسارى.