اقان راحمەتۋللين قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى بولىپ تاعايىندالدى, دەپ حابارلايدى Egemen.kz اقوردا سايتىنا سىلتەمە جاساپ.
«مەملەكەت باسشىسىنىڭ وكىمىمەن اقان اقاس ۇلى راحمەتۋللين قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى لاۋازىمىنا تاعايىندالدى», دەلىنگەن حابارلامادا.
اقان راحمەتۋللين 1967 جىلى 2 اقپاندا الماتى قالاسىندا دۇنيەگە كەلگەن. 1991 جىلى الماتى ەنەرگەتيكالىق ينستيتۋتىن بىتىرگەن. 1999 جىلى - ءسىم ديپلوماتيالىق اكادەمياسىن ءبىتىردى.
ديپلوماتيالىق مانسابىن 1993 جىلى رەفەرەنت لاۋازىمىنان باستاعان. قازاقستاننىڭ پاكىستانداعى, اۆسترياداعى ەلشىلىكتەرىندە, قازاقستاننىڭ نيۋ-يوركتەگى بۇۇ جانىنداعى تۇراقتى وكىلدىگىندە جۇمىس ىستەدى. وندا بۇۇ باس اسسامبلەياسىنىڭ ءۇشىنشى كوميتەتىنىڭ جۇمىسىن جۇرگىزدى.
سىرتقى ىستەر مينيستىرلىگىنىڭ الماتىداعى وكىلىنىڭ كەڭەسشىسى بولعان. قازاقستاننىڭ حالىقارالىق ۇيىمدارمەن ىنتىماقتاستىق ماسەلەلەرىنە جەتەكشىلىك ەتتى. ورتالىق اپپاراتتا كوپجاقتى ىنتىماقتاستىق دەپارتامەنتىن باسقاردى.
اقان راحمەتۋللين 2019 جىلدان بەرى قازاقستان رەسپۋبليكاسىنىڭ پاكىستان يسلام رەسپۋبليكاسىنداعى توتەنشە جانە وكىلەتتى ەلشىسى قىزمەتىن اتقارعان.
ءى ساناتتى توتەنشە جانە وكىلەتتى ۋاكىل ديپلوماتيالىق دارەجەسى بار.