بۇگىن ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ وسى جىلى قارا مەتاللۋرگيا ءوندىرىسىن ارتتىراتىن 6 جوبا ىسكە قوسىلاتىنىن ايتتى, دەپ حابارلايدى Egemen.kz
«قارا مەتاللۋرگيادا بيىل ناقتى كولەم يندەكسى – 105 پايىز دەپ بەلگىلەنگەن. ونىڭ ىشىندە فەرروقورىتپا ءوندىرىسى 10,4, بولات ءوندىرىسى 17 جانە پروكات ءوندىرىسى 19 پايىز ارتاتىندىعى جوسپارلانىپ وتىر. نەگىزگى ەكپىن «ارسەلورميتالل تەمىرتاۋ» جانە «قازحروم» كاسىپورىندارىنا تۇسەدى. بيىل ءبىز فەررو-قورىتپا, قۇرىلىس ارماتۋرالارى, بولات قۇبىرلار, تەمىر جانە مارگانەتس كەنىن قايتا وڭدەۋ ءوندىرىسىن ارتتىرۋعا مۇمكىندىك بەرەتىن 6 جوبانى ىسكە قوسامىز», دەدى وڭدەۋ ونەركاسىبىن دامىتۋ جايىندا بايانداعان مينيستر.
ءمينيستردىڭ ايتۋىنشا, جوسپارلانعان وسىمگە قول جەتكىزۋ ءۇشىن مۇددەلى مەملەكەتتىك ورگاندارمەن جانە بيزنەسپەن بىرلەسىپ, وتاندىق كاسىپورىنداردى شيكىزاتپەن قامتاماسىز ەتەتىن رەتتەۋشى تەتىك ازىرلەنەدى.
«2025 جىلعا قاراي ءوندىرىس كولەمى جىلىنا 4 ملن توننا بولاتقا جەتكىزىلىپ, «ارسەلورميتتال تەمىرتاۋ» كومپانياسىنىڭ نەگىزگى تەحنيكالىق قۋاتىن جاڭعىرتۋ اياقتالادى. سالىناتىن ينۆەستيتسيا كولەمى - 1,3 ترلن تەڭگە», دەدى بەيبىت اتامقۇلوۆ.