اپاتتان زارداپ شەككەندەرگە ءتيىستى مەديتسينالىق كومەك كورسەتىلەدى - ب.ساعىنتاەۆ

«ان-26 اسكەري ۇشاعى قۇلاعان جەرگە باردىم. ءتيىستى قىزمەت وكىلدەرىنە بولعان وقيعانىڭ سالدارىن جويۋدى تاپسىردىم. قازا بولعانداردىڭ تۋىستارى مەن جاقىندارىنا كوڭىل ايتامىن. زارداپ شەككەندەرگە بارلىق قاجەتتى مەديتسينالىق كومەك كورسەتىلۋدە», دەپ جازدى ب.ساعىنتاەۆ Twitter-دەگى پاراقشاسىندا.

سونىمەن قاتار وقيعا ورنىندا الماتى قالاسى قوعامدىق دەنساۋلىق باسقارماسىنىڭ جەدەل جاردەمنىڭ 10 رەانيماتسيالىق بريگاداسى جۇمىس ىستەپ جاتىر.

«زارداپ شەككەن ادامنىڭ ءبىرى 33 جاستاعى ەر ادامنىڭ سول جاق سانى اشىق سىنعان, جابىق مي جاراقاتىن العان. 25 جاستاعى جىگىت مي جاراقاتىن العان, قول ساۋساقتارى سىنعان. سونىمەن قاتار, 2-3 دارەجەلى كۇيىك العان. قازىر ولار الماتىداعى 4 اۋرۋحانانىڭ جانساقتاۋ بولىمىندە جاتىر. جاعدايلارى وتە اۋىر. دارىگەرلەر زارداپ شەككەندەردىڭ ءومىرىن قۇتقارۋ ءۇشىن بار كۇشىن سالۋدا. بارلىق كادرلار, سونىڭ ىشىندە قالانىڭ باس رەانيماتولوگى جۇمىلدىرىلدى», دەدى قالا اكىمدىگىنەن.