ماسكەۋدە قازاقستاننىڭ رەسەيدەگى ەلشىسى ەرمەك كوشەرباەۆ تاسس اقپاراتتىق اگەنتتىگى باس ديرەكتورىنىڭ ءبىرىنشى ورىنباسارى ميحايل گۋسمانعا 2-دارەجەلى «دوستىق» وردەنىن تاپسىردى, دەپ حابارلايدى Egemen.kz قازاقستاننىڭ رەسەيدەگى ەلشىلىگىنە سىلتەمە جاساپ.
مەملەكەت باسشىسى قاسىم-جومارت توقاەۆتىڭ جارلىعىنا سايكەس رەسەيلىك جۋرناليست «قازاقستان رەسپۋبليكاسى مەن رەسەي فەدەراتسياسى اراسىنداعى قاتىناستاردى دامىتۋعا قوسقان ۇلەسى ءۇشىن» جوعارى ماراپاتپەن ماراپاتتالدى.
ميحايل گۋسمان جوعارى ناگرادا ءۇشىن قازاقستان رەسپۋبليكاسىنىڭ باسشىلىعىنا ريزاشىلىعىن ءبىلدىرىپ, ءوزىنىڭ ارىپتەستەرىمەن بىرگە ەكى ەل اراسىنداعى اقپاراتتىق سالاداعى ىنتىماقتاستىقتى دامىتۋ جانە نىعايتۋ ءۇشىن قولدان كەلگەننىڭ ءبارىن جاسايتىنىنا سەندىردى.
ودان وزگە جۋرناليست قازاقستاندىقتاردى كەلە جاتقان ناۋرىز مەيرامى مەرەكەسىمەن قۇتتىقتاپ, ەلگە تىنىشتىق پەن باق-بەرەكە تىلەدى. «دوستىق» وردەنى – قوعامداعى ءوزارا كەلىسىمدى ساقتاۋ جونىندەگى جەمىستى جۇمىسى, حالىقتار اراسىنداعى بەيبىتشىلىكتى, دوستىق پەن ىنتىماقتاستىقتى نىعايتۋعا سىڭىرگەن ەڭبەگى ءۇشىن بەرىلەتىن قازاقستان رەسپۋبليكاسىنىڭ ەڭ جوعارى ناگرادالارىنىڭ ءبىرى.